"One Albania" ndërpret shërbimin e internetit, studentët protestojnë kundër qeverisë
Abonentët e "One Albania" kanë denoncuar një ndërprerje të plotë të shërbimit të internetit, duke e bërë të pamundur shfletimin në faqet e lajmeve dhe komunikimin përmes rrjeteve sociale.
Në kulmin e protestave masive të studentëve dhe qytetarëve kundër qeverisë në kryeqytet, një numër i madh abonentësh të operatorit celular “One” kanë denoncuar një ndërprerje totale të shërbimit të internetit. Sipas raportimeve dhe denoncimeve, përdoruesit kanë humbur çdo lloj aksesi në internetin celular, duke e bërë të pamundur shfletimin në faqet e lajmeve, përdorimin e browser-ave apo komunikimin përmes rrjeteve sociale.
Deri më tani, kompania “One” nuk ka dhënë asnjë shpjegim zyrtar apo njoftim mbi arsyet e këtij “blackout”-i të papritur. Ky bllokim i papritur i sinjalit dhe internetit, pikërisht gjatë zhvillimit të protestave antiqeveritare, ka ngritur dyshime dhe shqetësime të forta mes qytetarëve për një ndërhyrje të mundshme të qëllimshme.