Alarm për sigurinë kibernetike në botë: Dobësi kritike në PHP
Faqet e internetit dhe shërbimet publike në disa vende të botës janë vënë jashtë funksionit për shkak të dobësive kritike në PHP, një gjuhë programimi që përdoret gjerësisht në internet.
Një sërë faqesh interneti dhe shërbimesh publike në disa vende të botës janë vënë jashtë funksionit si masë paraprake, pas zbulimit të dy dobësive kritike të sigurisë në PHP, një gjuhë programimi që përdoret gjerësisht në internet. Agjencitë e sigurisë kibernetike u kanë kërkuar organizatave të instalojnë menjëherë përditësimet përkatëse, ndërsa ato që nuk mund ta bëjnë këtë në kohë këshillohen të shkëpusin përkohësisht sistemet e prekura nga interneti.
Sipas BBC-së, ndër institucionet dhe platformat që kanë ndërmarrë masa janë shërbimet publike të qeverisë së Finlandës, faqja e autoritetit të sigurisë kibernetike në Holandë, disa shërbime të Parlamentit holandez dhe faqe të lidhura me programe të BBC-së. Edhe fondacioni Wikimedia, që administron enciklopedinë online Wikipedia, ka njoftuar se po adreson problemin dhe ka çaktivizuar përkohësisht disa sisteme si masë mbrojtëse.
Dobësitë u zbuluan nga studiues të sigurisë kibernetike të kompanive Calif dhe Wiz, të cilët përdorën inteligjencën artificiale për identifikimin e tyre. Sipas studiuesve, problemet mund të kenë mbetur të pazbuluara për më shumë se një dekadë.
Agjencitë e sigurisë kibernetike në Mbretërinë e Bashkuar, Bashkimin Evropian, Australi, Japoni dhe Shtetet e Bashkuara kanë kërkuar që organizatat që përdorin PHP të instalojnë përditësimet e sigurisë. Agjencia britanike NCSC ka paralajmëruar se, në rastet kur rregullimi i menjëhershëm nuk është i mundur, organizatat duhet të konsiderojnë nxjerrjen përkohësisht jashtë funksionit të sistemeve të prekura.
Edhe Agjencia e Sigurisë Kombëtare e SHBA-së ka dhënë këshilla të ngjashme, ndërsa Shtëpia e Bardhë ka bërë të ditur se agjencitë federale po bashkëpunojnë me laboratorët kryesorë të inteligjencës artificiale për të përshpejtuar zgjidhjen e problemit.
Sipas ekspertëve, dobësitë mund t’u krijojnë sulmuesve mundësinë për të hyrë në sistemet e skedarëve ose në bazat e të dhënave të serverëve. Në rast se shfrytëzohen me sukses, ato mund të përdoren për ekzekutimin e kodit në distancë, instalimin e programeve keqdashëse ose ndërprerjen e funksionimit të faqeve të internetit.
Autoritetet u bëjnë thirrje organizatave që të zbatojnë përditësimet, të monitorojnë njoftimet e mëtejshme të sigurisë dhe të verifikojnë integritetin e sistemeve përpara se t’i rikthejnë plotësisht në funksion.