Mësuesit të tmerruar nga mesazhe kërcënuese për pjesëmarrjen në protesta
Mësuesit shqetësohen për mesazhe kërcënuese që kanë marrë në telefon, duke u paralajmëruar për akuzat për pjesëmarrjen në protesta kundër qeverisë.
Një denoncim shqetësues është bërë në rrjetet sociale, ku pretendohet se disa qytetarë që kanë marrë pjesë në protestat kundër qeverisë janë përballur me mesazhe kërcënuese në telefonat e tyre. Sipas denoncimit, qytetarët janë paralajmëruar se janë fotografuar gjatë protestës dhe se do të kontaktohen për t’u njohur me akuzat për të cilat do të mbajnë përgjegjësi. Denoncuesi, me profesion mësues, pretendon se mesazte të tilla u kanë mbërritur edhe kolegëve të tij, duke shkaktuar frikë dhe shqetësim mes stafit pedagogjik. Ai shprehet se mësuesit nuk kanë kryer asnjë veprim të paligjshëm, por vetëm kanë dalë në mbështetje të studentëve dhe të rinjve që prej ditësh protestojnë duke kërkuar dorëheqjen e kryeministrit Edi Rama. Në mesazhin e publikuar, mësuesit shprehen të tmerruar nga paralajmërimet dhe kërkojnë që denoncimi të bëhet publik, duke ruajtur anonimatin e tyre. Mesazhi që pretendohet se u është dërguar qytetarëve është: “Mirembrema! Je i fotografuar si pjesemarres sot ne proteste. Do kontaktoheni neser dhe do t’ju behet me dijeni akuza per te cilen do mbani pergjegjesi”. Deri më tani, nuk është verifikuar autorësia e mesazheve dhe as nëse ato janë dërguar nga ndonjë institucion shtetëror.