Liderët evropianë mblidhen në Mal të Zi për të ardhmen e Ballkanit

Kryeministri Edi Rama ka udhëtuar sot drejt Malit të Zi, ku do të marrë pjesë në Samitin e Liderëve të Procesit të Berlinit, që zhvillohet në Miloçer, pranë Budvës. Samiti dyditor mbledh drejtuesit e gjashtë vendeve të Ballkanit Perëndimor dhe përfaqësuesit e dhjetë shteteve evropiane, me synimin për të forcuar bashkëpunimin rajonal, integrimin ekonomik dhe përparimin e vendeve të rajonit drejt Bashkimit Evropian.

Në takim marrin pjesë kancelari gjerman Friedrich Merz, kryeministri i Kosovës Albin Kurti, kryeministri i Maqedonisë së Veriut Hristijan Mickoski, kryeministri i Kroacisë Andrej Plenković dhe kancelari austriak Christian Stocker. Në samit do të jenë gjithashtu ministri i Jashtëm italian Antonio Tajani, ministri francez për Evropën Benjamin Haddad dhe komisioneri evropiane për Zgjerimin, Marta Kos.

Sipas agjendës së parashikuar, pritja e liderëve do të nisë në orën 09:30, ndërsa punimet e samitit pritet të fillojnë rreth orës 10:20, me një sesion të hapur dhe fjalimet e përfaqësuesve pjesëmarrës. Rreth orës 13:00 është planifikuar një konferencë për shtyp mes kryeministrit të Malit të Zi dhe kancelarit gjerman Friedrich Merz, ku pritet të paraqiten qëndrimet kryesore mbi bashkëpunimin rajonal dhe perspektivën evropiane të Ballkanit Perëndimor.

Një pjesë e rëndësishme e agjendës për Shqipërinë lidhet me takimin që pritet të zhvillohet rreth orës 15:45 mes delegacioneve shqiptare dhe gjermane. Në qendër të këtij takimi do të jenë procesi i integrimit evropian i Shqipërisë, koordinimi i hapave të mëtejshëm dhe mundësitë për të përfituar nga instrumentet financiare dhe mekanizmat mbështetës të Bashkimit Evropian.

Takimi synon të shërbejë për diskutimin e objektivave dhe detyrimeve që lidhen me procesin e anëtarësimit, pa parashikuar marrjen e një vendimi përfundimtar për integrimin e Shqipërisë në BE. Ndërkohë, komisioneri evropiane për Zgjerimin, Marta Kos, do të zhvillojë takime të vëçanta me presidentin e Malit të Zi, Jakov Milatović, dhe kryetarin e Kuvendit, Andrija Mandić. Diskutimet do të përqendrohen te përparimin e Malit të Zi në negociatat e anëtarësimit dhe reformat që vendi duhet të përmbushë në rrugën drejt Bashkimit Evropian.

Në punimet e samitit pritet të marrin pjesë edhe përfaqësues të Bankës Botërore, Bankës Evropiane të Investimeve dhe Bankës Evropiane për Rindërtim dhe Zhvillim, institucione që mbështesin projekte zhvillimi dhe investime në vendet e Ballkanit Perëndimor.

Përveç çështjeve të integrimit dhe bashkëpunimit ekonomik, diskutimet mund të prekin edhe zhvillimet e brendshme politike në vendet pjesëmarrëse, përfshirë protestat në Shqipëri dhe Itali.

Procesi i Berlinit, i nisur në vitin 2014 me nismën e Gjermanisë, synon të nxise bashkëpunimin mes vendeve të Ballkanit Perëndimor dhe të mbështesë afrimin e tyre me Bashkimin Evropian.

Samiti në Mal të Zi vijon këtë proces, duke vendosur në tryezën çështjet e integrimit evropian, lidhjet ekonomike dhe bashkëpunimin ndërmjet gjashtë vendeve të rajonit.