Policët qëllonin ndaj makinës së një gruaje që vodhi pampersa, vriten foshnja 1-vjeçare në SHBA
Policët e SHBA-së qëlluan ndaj makinës së një gruaje që ishte akuzuar për vjedhje, duke vrarë një foshnjë 1-vjeçare dhe plagosur nënën e saj.
Një video e publikuar në internet tregon momentet e fundit para vdekjes së foshnjës 1-vjeçare Cohen Wiley, i cili ishte në krahët e nënës së tij, Velesiya Wiley, kur policët hapën zjarr ndaj makinës që transportonte dy gra të akuzuara për vjedhjen e një pakoje pelenash në Senatobia, pranë Memfisit.
Pamjet e publikuara tregojnë oficerët e policisë duke rrethuar makinën dhe duke u bërë thirrje dy grave të ndalonin. Më pas, shoferja tenton të kryejë një manovër në drejtim të efektivëve, çka çoi në hapjen e zjarrit nga ana e tyre. Një prej plumbave goditi foshnjën, duke i shkaktuar vdekjen.
Sipas dokumenteve të policisë, Wiley e kishte marrë foshnjën në krahë për të treguar se në automjet ndodhej një fëmijë. Në raportet zyrtare përmendet edhe oficeri Hunter Foster, i cili qëlloi drejt makinës, duke vrarë 1-vjeçarin Cohen Wiley dhe duke plagosur Ferrell.
Byroja e Hetimeve e Misisipit, e cila hetoi ngjarjen, deklaroi se shoferja u drejtua me automjetin nga oficerët, duke rrezikuar të përplaste njërin prej tyre. Ndërkohë, zyra e Prokurores së Përgjithshme të Misisipit, Lynn Fitch, njoftoi se të shtënat ishin të justifikuara.
Megjithatë, avokati i të drejtave civile Ben Crump, i cili përfaqëson familjen e viktimës, publikoi rezultatet e një autopsie të pavarur. Sipas saj, foshnja ishte qëlluar nga ana e automjetit dhe jo nga pjesa e përparme, duke ngritur pikëpyetje mbi rrethanat e të shtënave.