Liderët e Ballkanit Perëndimor mblidhen në Mal të Zi për samit të Procesit të Berlinit
Liderët e gjashtë vendeve të Ballkanit Perëndimor do të mblidhen në Mal të Zi për të diskutuar për bashkëpunimin ekonomik, sigurinë rajonale dhe integrimin evropian.
Liderët e gjashtë vendeve të Ballkanit Perëndimor pritet të mblidhen sot në Miloçer të Malit të Zi, në kuadër të samitit të Procesit të Berlinit. Pjesëmarrës në takim do të jenë përfaqësuesit e Kosovës, Shqipërisë, Serbisë, Maqedonisë së Veriut, Malit të Zi dhe Bosnjë-Hercegovinës, si dhe përfaqësues të vendeve dhe institucioneve evropiane.
Në qendër të diskutimeve do të jenë zhvillimi ekonomik i rajonit, rritja e konkurrueshmërisë dhe forcimi i lidhjeve ndërmjet gjashtë vendeve, me synimin për të përshpejtuar afrimin e tyre me Bashkimin Evropian. Rëndësi e veçantë pritet t’i kushtohet bashkëpunimit ekonomik ndërkufitar, lehtësimit të tregtisë dhe krijimit të mundësive të reja për investime.
Një tjetër temë e diskutimeve do të jetë siguria rajonale dhe nevoja për forcimin e bashkëpunimit ndërmjet vendeve të Ballkanit Perëndimor për përballimin e sfidave të përbashkëta. Të pranishëm në samit do të jenë edhe kryeministri i Shqipërisë Edi Rama dhe ai i Kosovës, Albin Kurti.
Samiti do të hapet nga kryeministri malazez Milojko Spajiç dhe kancelari gjerman Friedrich Merz, ndërsa pjesëmarrjen e ka konfirmuar edhe komisarja evropiane për zgjerim, Marta Kos. Procesi i Berlinit është një nismë diplomatike e nisur në vitin 2014, me qëllim mbështetjen e bashkëpunimit rajonal dhe integrimit evropian të gjashtë vendeve të Ballkanit Perëndimor.
Një nga shtyllat kryesore të kësaj nisme është Tregu i Përbashkët Rajonal, i cili synon të lehtësojë qarkullimin e mallrave, shërbimeve, kapitalit dhe njerëzve brenda rajonit. Në kuadër të Procesit të Berlinit, vendet pjesëmarrëse kanë ndërmarrë nisma për njohjen reciproke të kualifikimeve profesionale dhe lehtësimin e lëvizjes së qytetarëve.
Samiti i sotëm pritet të shërbejë edhe si mundësi për të vlerësuar përparimin e deritanishëm në zbatimin e marrëveshjeve rajonale dhe për të diskutuar hapat e ardhshëm drejt integrimit në tregun evropian. Procesi i Berlinit mbetet një nga platformat e bashkëpunimit ndërmjet Ballkanit Perëndimor dhe partnerëve evropianë, në mbështetje të zhvillimit ekonomik, stabilitetit dhe perspektivës evropiane të rajonit.