Burri akuzohet për kërcënime ndaj stafit të një deputeteje australiane

Një burrë 56-vjeçar akuzohet për kërcënime ndaj stafit të deputeteje australiane, Hannah Beazley, duke mbajtur një armë të tipit "nunçaku". Ky incident vjen pas një tjetër sulmi të ngjarë në Australi, ku një deputete e pavarur, Helen Haines, u plagos rëndë dhe humbi të dyja këmbët.

Sipas policisë, burri hyri në zyrën e Beazley në një periferi të Perthit, duke mbajtur një "nunçaku" dhe duke bërë kërcënime. Nunçaku është një armë e arteve marciale, e përbërë nga dy shkopinj të lidhur me njëri-tjetrin me litar ose zinxhir.

Burri u arrestua dhe u akuzua për mbajtje të armës në një mënyrë që mund të shkaktojë frikë, si dhe për kërcënim për kryerjen e një vepre të paligjshme. Ai e kaloi natën në paraburgim dhe pritet të dalë para një gjykate në Perth gjatë ditës së sotme.

Nuk ka asnjë të dhënë që sjellja e këtij personi të ketë lidhje me shoferin që përplasi me automjet deputeten federale Helen Haines të hënën, në shtetin e Viktorias, në bregun lindor të Australisë. I dyshuari për sulmin ndaj Haines, Brendan Nugent, doli të mërkurën para gjykatës, ku u përball me akuza për shkaktim të dëmtimeve të rënda me dashje, drejtim të rrezikshëm të automjetit që çoi në plagosje të rëndë, si dhe për shkaktim të dëmtimeve ndaj një zyrtari federal.

Policia po vijon hetimet për të përcaktuar motivin e sulmit. Haines, 65 vjeçe, deputete e pavarur, ndodhet në gjendje kritike në një spital në Melburn, ku mjekët kirurgë i kanë amputuar të dyja këmbët, sipas një njoftimi të Ministrisë së Shëndetësisë.