Meta duhet të paguajë 25 miliardë dollarë për mashtrimin e përdoruesve të Facebook

Meta, kompania e Facebook, është urdhëruar të paguajë 25 miliardë dollarë në New Mexico, pasi një gjykatë e konstatoi se kishte mashtruar përdoruesit e Facebook për privatësinë e tyre. Vendimi lidhet me skandalin Cambridge Analytica.

Gjykatari Francis Mathew vlerësoi se zbatimi i ligjit shtetëror justifikonte një penalitet mbi 219 miliardë dollarë, por e uli shumën në 25 miliardë dollarë. Padia ishte ngritur në vitin 2021 dhe përqendrohej tek informacionet që Facebook u jepte përdoruesve për personat që mund të kishin akses në të dhënat e tyre.

Në proces, juria shqyrtoi 29 deklarata të kompanisë dhe drejtuesve të saj, duke cilësuar 26 prej tyre si mashtruese. Numri i shkeljeve, mbi 43 milionë, u llogarit sipas përdoruesve ose banorëve që kishin qenë audiencë e deklaratave. Para vendimit, autoritetet kërkonin 35–40 miliardë dollarë, ndërsa Meta pretendonte se penaliteti nuk duhej të kalonte 3.45 miliardë.

Cambridge Analytica kishte siguruar pa pëlqimin e tyre të dhëna nga deri në 87 milionë përdorues përmes një aplikacioni të palëve të treta. Firma britanike punoi për fushatën presidenciale të Donald Trump në vitin 2016.

Meta e kundërshton vendimin dhe argumenton se çështja cenon lirinë e shprehjes. Autoritetet e New Mexico e konsiderojnë atë një hap të rëndësishëm për përgjegjësinë e kompanive të teknologjisë ndaj konsumatorëve.

Të ardhurat nga penaliteti parashikohet të kalojnë arsimit në New Mexico. Megjithatë, procedurat e apelimit mund ta shtyjnë për vite arkëtimin e shumës.