"82 vite komunizëm në Shqipëri" - Biznesmeni Agron Luzi: Protesta e studentëve më zgjoi nga gjumi, u ktheva për të denoncuar çfarë kam vuajtur
Biznesmeni dhe protestuesi Agron Luzi ka rrëfyer historinë e tij personale, që nga largimi nga Shqipëria në vitin 1991, ndërtimi i jetës në Itali dhe rikthimi për të investuar në vendlindje.
Gjatë një interviste në emisionin “Minuta e Parë” në News24, Agron Luzi ka deklaruar se protesta e studentëve dhe pedagogëve kundër qeverisë e ka nxitur të rikthehet në Shqipëri për të denoncuar problematikat me të cilat pretendon se është përballur gjatë aktivitetit të tij si biznesmen. Luzi ka thënë se protesta e studentëve dhe pedagogëve e ka zgjoi nga gjumi dhe se erdhi për të denoncuar personalisht se çfarë kam vuajtur unë pasi ndërtova jetën.
Luzi ka treguar se ishte larguar nga Shqipëria më 7 mars të vitit 1991, në moshën 17-vjeçare, me një anije drejt Italisë. Ai kujtoi se, pas mbërritjes, kishte humbur ndjenjat dhe ishte zgjuar në spital. Së bashku me tre vëllezërit, Luzi nisi të punonte dhe më pas të merrej me tregti, duke sjellë në Shqipëri makina dhe produkte të ndryshme. Më vonë, ai u angazhua edhe në sektorin e ndërtimit dhe në industrinë e përpunimit të materialeve inerte.
Luzi ka ngritur akuza për korrupsionin, duke pretenduar se gjatë aktivitetit të tij ekonomik është përballur me kërkesa për pagesa nën dorë. Ai ka deklaruar se ne jemi njerëz punëtorë, njerëz që kemi parë punën tonë, njerëz që nuk kemi bërë pis kurrë dhe nuk kemi dashur kurrë të bëhemi pjesë e një megakorrupsioni kanceroz, i cili filloi me thënien: ‘Nëse nuk kollitesh këtu, nuk bën dot hajër’. Paguaj këtu, paguaj atje, çdo gjë poshtë tavolinës.
Luzi ka kritikuar gjithashtu klasën politike shqiptare, duke pretenduar se vendi vijon të vuajë pasojat e mentalitetit komunist. Ai ka thënë se ky vend ka parë vetëm komunizëm. Pra, 1944–2026 i thonë 82 vjet komunizëm. Luzi ka treguar se kishte ngritur një aktivitet në sektorin e guroreve dhe kishte sjellë në Shqipëri makineri moderne, përfshirë një fabrikë me kapacitet përpunimi prej 120 metrash kub në orë. Ai pretendoi se pajisjet e tij kishin mbetur për një kohë të gjatë të papërdorura në ambientet e një fabrike çimentoje, situatë që, sipas tij, i kishte shkaktuar dëme dhe shqetësime të mëdha.
Luzi ka theksuar se rikthimi i tij në Shqipëri lidhet me dëshirën për të bërë publike përvojën personale dhe për të mbështetur protestën e studentëve dhe pedagogëve, të cilët prej dhjetë ditësh kërkojnë ndryshime dhe dorëheqjen e kryeministrit Edi Rama.