Hetimi për kontrabandë në veri të Kosovës: 10 të dyshuar nën hetim

Autoritetet kosovare janë duke i hetuar dhjetë persona të dyshuar për kontrabandimin e mallrave në veri të vendit. Hetimi u zhvillua pas hetimeve gjashtëmujore dhe u sekuesua mallra me vlerë mbi 200.000 euro.

Zëvendësdrejtori i Policisë së Kosovës për rajonin e veriut, Veton Elshani, konfirmoi se dhjetë të dyshuar u kapën të enjten gjatë një aksioni në veri dhe u sollën para gjykatës në një seancë degjimore dhe pastaj u liruan derisa hetimet ndaj tyre vazhdojnë.

Më herët, Prokuroria Themelore në Mitrovicë tha në një komunikatë se aksioni u zhvillua pas hetimeve gjashtëmujore. Gjatë kësaj periudhe, janë sekuesuar në pergjithësi më shumë se 22 automjete, si dhe mallra me vlerë mbi 200.000 euro, sipas njoftimit.

Në njoftimin e Prokurorisë në Mitrovicë, sqarohet se, që nga muaji prill, gjatë hetimeve janë identifikuar sërish lokacionet dhe rrugët ilegale përmes të cilave mallrat futeshin në territorin e Kosovës.

“Prej majit deri në shtator të vitit 2026 janë zhvilluar më shumë se 20 aksione në zonat kufitare dhe në vendbanimet e komunave të Zubin Potokut, Zveçanit, Leposaviqit dhe Mitrovicës së Veriut”, thuhet në njoftim.

Në mesin e mallrave të kontrabanduar kishte produkte ushqimore, barna pa pulla akcize, pije, produkte higjenike dhe tekstile, sipas autoriteteve.

“Për këto mallra nuk dihen origjina, menyra e ruajtjes dhe e transportit, as afati i përdorimit, për çka ata paraqesin rrezik të drejtpërdrejtë për shëndetin e qytetarëve. Nënkohësisht, aktivitete të tillë i shkaktojnë dëme buxhetit të shtetit dhe bizneseve që veprojnë në përputhje me ligjin”, thuhet më tej në njoftim.

Ndryshe, pas sulmit të armatosur në Banjskë, në vitin 2023, institucionet e Kosovës mbyllën më shumë se 20 rrugë alternative që besohet se çojnë drejt Serbisë.