Van Gaal kritikon UEFA-n për formatin e Champions League: "Mendon vetëm për paratë, është një botë e vogël e korruptuar"

Ish-trajneri holandez Louis van Gaal nuk i ka kursyer akuzat ndaj UEFA-s dhe drejtuesve të futbollit evropian. Ai ka kritikuar formatin e ri të Champions League, duke deklaruar se pas ndryshimeve qëndrojnë interesat financiare dhe jo përmirësimi i nivelit të konkurrencës.

"UEFA mendon vetëm për paratë. Është një botë e vogël e korruptuar", deklaroi Van Gaal gjatë një prononcimi për mediat holandeze.

Kritikat e tij lidhen me formatin që UEFA aplikon prej sezonit 2024-2025, kur zëvendësoi fazën tradicionale të grupeve me një fazë të vetme lige. Numri i skuadrave pjesëmarrëse u rrit nga 32 në 36, ndërsa secila prej tyre zhvillon tetë ndeshje në vend të gjashtë takimeve të formatit të mëparshëm.

Për Van Gaal, kjo skemë ka krijuar disnivel të madh mes skuadrave dhe ka dëmtuar rivalitetin që duhet të karakterizojë kompeticionin më të rëndësishëm evropian për klube.

"Quhet Champions League, apo jo? Skuadrat më të mira duhet të marrin pjesë në të. Në këtë mënyrë ka një disnivel të madh dhe, si pasojë, edhe më shumë gola", u shpreh ish-trajneri holandez.

Van Gaal ngriti gjithashtu shqetësimin për ngarkesën fizike të futbollistëve. Sipas tij, zgjerimi i kalendarit dhe shtimi i takimeve po ndikojnë drejtpërdrejt në rritjen e dëmtimeve.

"Ka shumë ndeshje dhe, si pasojë, edhe më shumë dëmtime të lojtarëve", theksoi ai.

Me këto deklarata, Van Gaal vë në diskutim dy nga argumentet kryesore të reformës së UEFA-s: rritjen e numrit të përballeve dhe forcimin e konkurrencës. Për ish-trajnerin holandez, formati i ri po prodhon më shumë ndeshje, por jo domosdoshmërisht futboll më cilësor.