Motra e Rajmondës Kotorriti: Duam të dimë nëse është gjallë apo jo

Kontakti i fundit me Rajmondën daton në qershor të vitit 2001. Gjatë një telefonate me familjen, ajo tregoi se jetonte në Itali dhe punonte si banakiere në një lokal në Milano. Ajo u kishte thënë të afërmve se deshonte të qëndronte atje për të kërkuar para.

Pas kësaj telefonate, familja nuk arriti të komunikonte më me të. Të shqetësuara për fatin e saj, motrat iu drejtuan fillimisht policisë në Gramsh, ndërsa më pas kërkuan ndihmë të Interpolit dhe autoriteteve italiane.

Në vitin 2003, familja mori një informacion se Rajmonda dyshohej se ishte përfshirë në prostitucion dhe se burri me të cilin shoqërohej mund ta kishte shfrytëzuar. Po atë vit, një grua që u prezantua si bashkëjetuesja e saj në Lodi raportoi në polici se Rajmonda ishte zhdukur pasi kishte kaluar një natë me një klient.

Që prej vitit 2003, nuk ka pasur më asnjë kontakt të sigurt me të. Në vitin 2006, familja mori një informacion se ajo mund të ishte parë në Romë, por ky pretendim nuk u konfirmua.

Pas 25 vitesh pasiguri, Laureta dhe familjaret e saj nuk kanë hequr dorë nga kërkimet. Përmes shoqatës Penelope Lombardia, e cila mbështet familjet e personave të zhdukur, ata kanë rinisur apelin publik, duke shpresuar se dikush mund të ndihmojë në zbardhjen e rastit.

“Familja ime dhe unë nuk e kemi humbur kurrë shpresën për ta gjetur Rajmondën. Ajo është e lirë të jetë jetën e saj, thjesht duam të dimë se është gjallë. Nëse nuk është, do të pranojmë çdo skenar. Por duam të dimë çfarë i ka ndodhur. Nëse ka vdekur, duam të kemi një varr ku të qajmë”, është shprehur Laureta.

Ajo shpreson që apeli të arrijë te dikush që mund ta ketë parë ose të ketë dëgjuar diçka për Rajmondën gjatë këtyre viteve.

“Dikush duhet ta ketë parë ose takuar gjatë këtyre viteve. Dikush duhet të dijë diçka. Jemi të sigurt”, ka përfunduar motra e saj.