Macron paralajmëron kufizime për protestat në Francë

Presidenti francez Emmanuel Macron ka paralajmëruar masa të reja për kufizimin e demonstratave në Francë, pas episodeve të dhunës dhe vandalizmit në Paris dhe qytete të tjera të vendit. Macron ka deklaruar se autoritetet do të lejojnë vetëm marshimet e organizuara nga sindikatat, ndërsa tubimet e tjera do të ndalohen aty ku legjislacioni e lejon një gjë të tillë. Demonstratat sindikaliste do të zhvillohen përgjatë itinerareve të përcaktuara paraprakisht në bashkëpunim me policinë. Kreu i shtetit francez pranoi se gjatë menaxhimit të protestave të fundit pati mangësi në planifikim dhe zhvillime të papritura. Demonstratat, ku morën pjesë më shumë se 500 mijë persona, u shoqëruan me sulme ndaj ndërtesave publike, plaçkitje dyqanesh dhe përplasje në disa qytete. Macron ia atribuoi aktet e dhunshme grupeve të organizuara të ekstremit të majtë dhe personave të përfshirë në veprimtari kriminale, duke i akuzuar për përpjekje për të destabilizuar institucionet demokratike. Megjithatë, mobilizimet përfshinin grupe të ndryshme shoqërore, mes tyre studentët e shkollave të mesme dhe pjesëmarrësit të lëvizjes së Jelekverdheve, e cila u shfaq në vitin 2018. Paralelisht me masat e qeverisë, policia e Parisit ka vendosur kufizime për tubimet në disa prej zonave të rëndësishme të kryeqytetit, përfshirë hapësirat pranë Pallatit të Elizës dhe bulevardin Champs-Élysées. Ndalimi është parashikuar të zbatohej nga ora 08:00 deri në orën 20:00, për shkak të rrezikut të përsëritjes së incidenteve të dhunshme. Masa të ngjashme janë ndërmarrë edhe në qytete të tjera franceze. Kufizimet prekin një periudhë të shoqëruar me protesta studentore, të cilat vijojnë që nga mesi i shtatorit. Studentët kundërshtojnë mbipopullimin në klasa, mungesën e mësuesve dhe mënyrën e pranimit në universitete. Të enjten, studentët bllokuan përkohësisht hyrjet e disa institucioneve arsimore në Paris, përfshirë universitetin Sciences Po. Policia ndërhyri për të rivendosur aksesin në ndërtesa, të cilat u rihapën më vonë. Ndërkohë, sindikata CGT ka kritikuar qasjen e autoriteteve, duke theksuar se ruajtja e rendit publik është përgjegjësi e qeverisë dhe duke kërkuar fundin e masave që i konsideron si shtypëse.