Dy ish-futbollistët italianë dënohen për veprimet e tyre si agjentë sportivë

Gjykata Federale Kombëtare italiane ka dënuar dy ish-futbollistët Simone Pepe dhe Giuseppe Sculli me 18 muaj pezullim dhe 20 mijë euro gjobë për veprimet e tyre si agjentë sportivë pa licencë. Sipas Federatës Italiane të Futbollit (FIGC), Pepe dhe Sculli kanë marrë pjesë në negociata financiare dhe në lidhjen e kontratave mes futbollistëve dhe klubeve, duke ushtruar një aktivitet për të cilin nuk kishin autorizimin e nevojshëm.

Federata ka vendosur të njëjtin sanksion edhe ndaj avokatit Alessandro Buccieri, ortak në minorancë i kompanisë SP Management Srl, e përfshirë në këto çështje. Por problemi për dy ish-futbollistët nuk përfundon me masat disiplinore të Federatës.

Sipas gazetës italiane La Gazzetta dello Sport, çështja ka marrë edhe përmasa penale, pas pretendimeve se Pepe dhe Sculli kanë tentuar të përfitojnë shuma të mëdha para nga futbollistët që vendosen të ndërpresin marrëdhëniet me ta. Mes lojtarëve që revokuan prokurat përfaqësuese përmbetën Favasulli dhe Davide Bettella. Pas këtij vendimi, dy ish-futbollistët dyshohet se kërkuan pagesën e penalitetëve prej qindra mijëra eurosh, me argumentin e ndërprerjes së parakohshme të mandatit.

Pikërisht këto kërkesa financiare kanë hapur një tjetër front për Pepe dhe Scullin. Sipas raportimit të gazetës italiane, të dy janë nën hetim penal për ushtrim të paligjshëm të profesionit dhe tentativë zhvatjeje.

Ndërsa Gjykata Federale ka vendosur tashmë sanksionet disiplinore, hetimi penal mbetet një procedurë më vete. Dyshimet për tentativë zhvatjeje nuk përbëjnë ende një vendim fajësie nga gjykata penale.