Përfundon ora verore, të dielën akrepat kthehen një orë pas

Të dielën, më 25 tetor, do të ndryshojë ora, duke shënuar përfundimin e periudhës së orës verore dhe rikthimin e orës dimërore. Ndryshimi do të bëhet gjatë orëve të para të mëngjesit, kur akrepat do të kthehen 60 minuta pas. Konkretisht, në momentin që ora tregon 04:00, ajo do të kthehet në 03:00.

Telefonat inteligjente, kompjuterët dhe shumica e pajisjeve elektronike që kanë të aktivizuar përditësimin automatik do ta kryejnë vetë ndryshimin. Ndërkohë, qytetarët duhet të kujdesen për rregullimin manual të orëve të murit, orëve të dorës dhe pajisjeve të tjera që nuk e ndryshojnë automatikisht kohën.

Me hyrjen në fuqi të orës dimërore, mëngjeset do të kenë më shumë dritë natyrore, ndërsa në mbrëmje do të errësohet më herët.

Ndryshimi i orës zbatohet dy herë në vit dhe synon përshtatjen e aktiviteteve përditëshme me kohëzgjatjen e dritës natyrore.

Sistemi i orës verore dhe dimërore ka një histori të gjatë në Evropë. Vendet e ndryshme nisën ta zbatonin gjatë shekullit të kaluar, ndërsa përdorimi i tij u zgjera pas krizës energjetike të vitit 1973, me synimin për të shfrytëzuar më mirë dritën e diellit dhe për të kursyer energji.

Në Bashkimin Evropian, datat e ndryshimit të orës harmonizohen përmes Direktivës 2000/84/KE, sipas së cilës ora verore përfundon të dielën e fundit të tetorit dhe rifillon të dielën e fundit të marsit.

Pas gjashtë muajsh, më 28 mars 2027, do të rikthehet ora verore. Atëherë akrepat do të lëvizin një orë përpara, nga 02:00 në 03:00.

Ndryshimi i radhes do të ndodhë natën mes së shtunës, 24 tetor, dhe së dielës, 25 tetor 2026.