BE kërkon goditjen e Huthëve: Ngrirje pasurive dhe futje në listën terroriste

Parlamenti Evropian ka miratuar një rezolutë që kërkon përfshirjen e rebelëve Huthi të Jemenit në listën e organizatave terroriste të Bashkimit Evropian. Rezoluta, e cila nuk është ligjërisht detyruese, u miratua me shumicë të madhe votash. Në të kërkohet ngrirja e të gjitha fondeve dhe pasurive ekonomike që u përkasin Huthëve dhe personave që i ndihmojnë ata.

Rezoluta thekson gjithashtu pasojat për popullsinë civile, duke vënë në dukje se sulmet kanë shkaktuar viktima dhe zhvendosje të banorëve, ndërsa kriza humanitare në Jemen është përkeqësuar. Huthët, të njohur zyrtarisht si Ansar Allah, janë në luftë me qeverinë e njohur ndërkombëtarisht të Jemenit që nga viti 2014.

Eurodeputetët kërkuan gjithashtu forcimin e misionit detar të BE-së, Aspides, i cili synon mbrojtjen e anijeve tregtare në Detin e Kuq. Aktualisht, misioni ka tre anije nga Italia dhe Greqia, ndërsa Belgjika dhe Holanda kanë premtuar të dërgojnë edhe dy të tjera. Shefja e diplomacisë së BE-së, Kaja Kallas, ka deklaruar se nevojiten të paktën 10 anije për të përmbushur detyrat e misionit.