Turizmi në Shqipëri vazhdon të rritet, por me ritme më të ngadalta

Turizmi në Shqipëri vazhdon të rritet, por me ritme më të ngadalta. Në shtator, hyrjet e shtetasve të huaj u rritën me 2.1% krahasuar me vitin e kaluar, ndërsa për nentë muajt e para të vitit rritja ishte 4.9%. Shtatori pasoi një sezon veror me luhatje të konsiderueshme, me rritje të hyrjeve të shtetasve të huaj në qershor, korrik dhe gusht.

Rritja e hyrjeve të shtetasve të huaj në shtator tregon se edhe fundi i sezonit veror vijoi me ritme modeste, pavarësisht zgjerimit të aktivitetit turistik dhe përpjekjeve për zgjatjen e sezonit në një pjesë të destinacioneve.

Për periudhën janar-shtator 2026, hyrjet e shtetasve të huaj arritën në 10.73 milion, nga 10.23 milion në të njëjtin periudhë të vitit të kaluar. Rritja prej 4.9% është më e ulët se ritmi prej 5.3% i regjistruar për tetë muajt e para të vitit.

Ngadalësimi bëhet më i dukshëm në krahasim me vite të mëparshme. Në vitin 2025, hyrjet e shtetasve të huaj u rritën me 6.6%, ndërsa në vitin 2024 zgjerimi kishte qenë rreth 15%. Pas disa vitesh rritjeje me ritme dyshifrore, flukset e shtetasve të huaj po shfaqin një zgjerim më të moderuar.

Edhe gushti, muaji me fluksin më të lartë të vizitorëve, shënoi rritjen më të dobët që nga pandemia, me vetëm 2% më shumë hyrje të shtetasve të huaj krahasuar me një vit më parë, megjithëse numri absolut i hyrjeve kishte arritur rekord.

Operatorët turistikë kanë raportuar një sezon pozitiv për numrin e vizitorëve, por më të pasigurt për të ardhurat. Gjatë shtatorit, përfaqësues të sektorit kanë evidentuar prirjen e turistëve për qëndrime më të shkurtra, rezervime të momentit të fundit dhe kujdes më të madh me shpenzimet.

Rrahman Kasa, kryetar i Unionit Turistik Shqiptar, ka deklaruar se rritja e numrit të turistëve duhet parë me vëmendje nga të ardhurat që ata gjenerojnë.

“Ecuria deri tani është e mirë. Nëse flasim për numrat, ka një rritje. Mbetet për të parë se çfarë do të sjellë në të ardhurat, pra nëse do të kemi më shumë të ardhura se vitin e kaluar dhe sa do të jetë kjo rritje”, është shprehur ai.

Në ndërkohe, të dhënat e INSTAT tregojnë se në shtator në Shqipëri hynë gjithsej 2.024 milion shtetas shqiptarë dhe të huaj, me rritje 3% në krahasim me një vit më parë. Hyrjet e shtetasve shqiptarë u rritën me 4.5%, në 737.6 mijë, ndërsa daljet e tyre arritën në 823.9 mijë, me rritje 6.6%.

Gjatë muajit Shtator 2026, rezultojnë të kenë hyrë, në territorin e Republikës së Shqipërisë, 2.024.320 shtetas shqiptarë dhe të huaj. Ky tregues ka pësuar një rritje me 3,0 %, krahasuar me Shtator 2025. Gjithashtu, 2.141.133 shtetas shqiptarë dhe të huaj, rezultojnë të kenë dalë nga territori i Republikës së Shqipërisë, duke shënuar një rritje me 0,6 %, krahasuar me të njëjtin periudhën e një viti më parë.