Argjentina shpall listë të zezë: Pesë organizata klasifikohen si terroriste

Qeveria e Argjentinës ka shpallur pesë organizata të mëdha kriminale dhe të armatosura të Amerikës Latine si organizata terroriste, në kuadër të përpjekjeve për të goditur aktivitetet e tyre kriminale dhe rrjetet e financimit. Vendimi u njoftua nga presidenti Javier Milei dhe parashikon përfshirjen e këtyre grupeve në Regjistrin Publik të Personave dhe Entiteteve të Lidhura me Aktet e Terrorizmit dhe Financimin e Tyre.

Në listën e organizatave të shpallura terroriste përfshihen Karteli Sinaloa dhe La Nueva Familia Michoacana nga Meksika, Ushtria Çlirimtare Kombëtare e Kolumbisë, disidentët e FARC-EP, si dhe grupi kriminal Los Tiguerones nga Ekuadori.

Masat e marrë janë në kuadër të një koordinimi mes Ministrisë së Punëve të Jashtme, Ministrisë së Sigurisë, Ministrisë së Drejtësisë dhe Sekretariatit të Inteligjencës Shtetërore. Në një deklaratë zyrtare, presidenca argjentinase theksoi se kapacitetet operacionale, shtrirja gjeografike dhe zgjerimi i aktiviteteve të paligjshme të këtyre organizatave përbëjnë një kërcënim të drejtpërdrejtë për sigurinë e qytetarëve.

Autoritetet argjentinase bëjnë të ditur se vendimi mbështetet në vlerësimet e inteligjencës dhe analizat e rrezikut që këto grupe paraqesin për sigurinë kombëtare, me synimin për të forcuar mekanizmat e luftës kundër krimit të organizuar dhe financimit të terrorizmit.