Franca dhe Britania zhvillojnë stërvitjen e parë të përbashkët me simulim të sulmit bërthamor
Forcat ajrore të Francës dhe Britanisë së Madhe kanë zhvilluar një stërvitje të përbashkët ushtarake, gjatë së cilës avionët luftarakë simuluan një sulm bërthamor.
Për herë të parë, avionët britanikë morën pjesë në këtë lloj ushtrimi së bashku me avionët francezë. Stërvitja u zhvillua të martën në mbrëmje, me avionët francezë Rafale që u ngritën nga baza ajrore Saint-Dizier, në verilindje të Francës, të shoqëruar nga avionët luftarakë britanikë Typhoon të Forcave Ajrore Mbretërore. Gjatë manovrave u simulua një skenar sulmi bërthamor, në kuadrin e përgatitjeve ushtarake dhe forcimit të bashkëpunimit mes dy vendeve në fushën e mbrojtjes strategjike. Kjo stërvitje shënonte një hap të rëndësishëm në thellimin e bashkëpunimit franko-britanik për parandalimin bërthamor, në një kohë kur siguria evropiane dhe aftësitë mbrojtëse të kontinentit janë kthyer në çështje kyçe. Bashkëpunimi mes Parisit dhe Londrës në këtë fushë u forcua pas marrëveshjeve të arritura në takimin e nivelit të lartë të zhvilluar në Northwood në korrik të vitit 2025. Stërvitja synonte të rrisë koordinimin operacional mes dy aleatëve dhe të forcojë kapacitetet e tyre për t'u përgjigjur kërcënimeve të mundshme ndaj sigurisë evropiane.