Melania Trump siguron armëpushim për qytetin ukrainas në prag të katastrofës

Sipas Shtëpisë së Bardhë, marrëveshja pritet të hyjë në fuqi më 29 tetor, ndërsa banorët përballen me mungesë ushqimesh, uji të pijshëm dhe shërbimesh mjekësore. Shtëpia e Bardhë ka njoftuar se Melania Trump ka ndërmjetësuar me sukses një armëpushim mes Rusisë dhe Ukrainës në qytetin e Oleshky-t, i cili ndodhet nën pushtimin rus. Sipas deklaratës zyrtare, armëpushimi në këtë qytet të vijës së frontit, i përshkruar si “në prag të katastrofës”, do të nisë më 29 tetor. Deri më tani, as Moska dhe as Kievi nuk kanë reaguar publikisht ndaj këtij njoftimi. “Popullsia e mbetur në Oleshky përbëhet kryesisht nga të moshuar, të cilët kanë nevojë urgjente për kujdes mjekësor, ilaçe, ushqime dhe ujë të pastër”, thuhet në deklaratën e Shtëpisë së Bardhë. Sipas njoftimit, Melania Trump dhe përfaqësuesi i saj kanë punuar drejtpërdrejt me udhëheqësit rusë dhe ukrainas për të përcaktuar kushtet e armëpushimit lokal. “Përfaqësues civilë, jo ushtarakë, nga të dyja vendet do të punojnë së bashku për të vizituar banorët e Oleshky-t në shtëpitë e tyre dhe për të përcaktuar nivelin e ndihmës që u nevojitet”, citohet të ketë deklaruar Melania Trump. Ajo shtoi se banorët që dëshirojnë të largohen nga qyteti do të marrin mbështetje të koordinuar dhe transport drejt destinacionit të zgjedhur prej tyre. “Pres që disa të dëshirojnë të shkojnë në Rusi, ndërsa të tjerë në Ukrainë”, tha bashkëshortja e presidentit amerikan, Donald Trump. Sipas Melania Trump, banorët e qytetit kanë energji elektrike të kufizuar, jetojnë mes rrugëve të minuara dhe përballen rregullisht me sulme ushtarake. “Pa ndërhyrjen time, mundësia për të sjellë ndihma humanitare në qytet dhe për të evakuuar të moshuarit do të ishte e pamundur”, deklaroi ajo. Megjithatë, deklarata e Shtëpisë së Bardhë nuk specifikon se sa do të zgjasë armëpushimi. Muajin e kaluar, disa prej banorëve të mbetur në Oleshky i rrëfyen BBC-së kushtet e rënda në të cilat po mbijetojnë, mes bombardimeve të vazhdueshme dhe izolimit nga furnizimet me ushqime dhe ujë. Sipas dëshmive të tyre, disa banorë janë detyruar të konsumojnë edhe barishte të egra nga kopshtet për të mbijetuar. Fëmijët në zonën më të gjerë të Oleshky-t po përballen me kequshqyerje, mungesë të shërbimeve mjekësore dhe ndërprerje të arsimimit. Banorët i thanë BBC-së se në zonë funksionon pjesërisht vetëm një spital, i cili hapet disa ditë në javë për të kryer ndërhyrje urgjente, përfshirë amputime. Ministri i Jashtëm i Ukrainës, Andrii Sybiha, ka deklaruar se popullsia lokale po jeton nën një “bllokadë të plotë” nga forcat ruse. Ukraina thotë se është përpjekur të dërgojë furnizime në zonë, por nuk ka arritur sukses gjatë muajve të fundit. Në shtator, edhe Kremlini pranoi se qyteti po përballej me një “situatë kritike” dhe me probleme në furnizimin me ushqime dhe ilaçe. Megjithatë, pala ruse deklaroi se ushtria po punonte për zgjidhjen e problemeve, duke fajësuar Kievin për situatën. Oleshky, në rajonin e Khersonit, u pushtua nga forcat ruse në ditët e para të ofensivës së gjerë të Moskës, në shkurt të vitit 2022. Qyteti ndodhet mes lumit Dnipro, që e ndan nga pozicionet ukrainase, dhe forcave ruse, duke e lënë popullsinë të izoluar dhe me mundësi të kufizuara për furnizime. Armëpushimi i njoftuar nga Shtëpia e Bardhë synon të krijojë mundësi për dërgimin e ndihmave humanitare dhe evakuimin e banorëve më të rrezikuar, nëse marrëveshja zbatohet nga palët.