Stuhia Austen godet Belgjikën, katër të plagosur dhe kaos në transport

Stuhia Austen ka përfshirë Belgjikën me erëra të forta dhe reshje të dendura shiu, duke shkaktuar dëme materiale, probleme në transport dhe plagosjen e katër personave në Bruksel. Autoritetet kanë aktivizuar masat e emergjencës dhe qytetarëve u është kërkuar të kufizojnë lëvizjet për shkak të rrezikut nga pemët dhe objektet që mund të rrëzohen.

Sipas raportimeve nga mediat e huaja, shërbimi meteorologjik belg ka lëshuar alarm portokalli për erëra të forta në pjesën perëndimore të vendit, veçanërisht në vijat bregdetare, ku shpejtësia e erës pritet të kalojë 100 kilometra në orë. Pasojat e stuhisë janë ndier veçanërisht në kryeqytetin belg. Një pemë e madhe u rrëzua pranë një restoranti në qendrën historike të Brukselit, duke demtuar tendën dhe mobiliet e vendosura në ambientin e jashtëm.

Tre persona u plagosën nga incidenti dhe u transportuan në spital, por dëmtimet e tyre nuk konsiderohen serioze. Në një tjetër zonë të qytetit, një person u plagos pasi një degë peme i ra në kokë dhe gjithashtu u dërgua në spital. Erërat e forta kanë rrëzuar pemë dhe degë në disa pjesë të vendit, duke vështirësuar qarkullimin në rrugë dhe në rrjetin hekurudhor.

Probleme janë raportuar edhe në autostradat E17, që lidh zonën e Liège me Antwerpin, dhe E313, mes Antwerp-it dhe Liège-it. Në disa segmente, qarkullimi është penguar nga pemët e rrëzuara dhe përmbytjet. Në qytetin bregdetar të Ostendit, një tunel rrugor është mbyllur për shkak të grumbullimit të ujit. Ndërkohë, parqet dhe hapësirat e gjelbra në Bruksel dhe Liège janë mbyllur për arsye sigurie.

Stuhia Austen ka shkaktuar ndërprerje edhe në trafikun ajror. Kompania ajrore KLM ka anuluar 20 fluturime për shkak të erërave të forta në Holandë, ndërsa 22 anulime të tjera janë paralajmëruar për ditën pasuese. Aeroporti Schiphol në Amsterdam ka raportuar ndërprerje të kufizuara të fluturimeve, ndërsa autoritetet meteorologjike holandeze kanë paralajmëruar për erëra që mund të arrijnë shpejtësinë 90 kilometra në orë në disa zona.

Pasojat e stuhisë Austen janë shtrirë edhe në vende të tjera evropiane. Në Francë, rreth 300 mijë banesa kanë mbetur pa energji elektrike, ndërsa në Britani janë raportuar ndërprerje të energjisë për rreth 12 mijë familje. Erërat e forta dhe reshjet intensive kanë shkaktuar probleme në transport dhe dëme materiale në disa rajone.

Autoritetet belge kanë paralajmëruar se rreziku nga moti i keq do të vazhdojë deri në mëngjesin e ditës pasuese, duke u bërë thirrje qytetarëve të shmangin udhëtimet e panevojshme dhe të tregojnë kujdes në zonat me pemë të larta dhe pranë ndërtesave.