Ambasadori amerikan: SHBA mund të godasë Iranin që këtë fundjavë!
Tensionet mes Shteteve të Bashkuara dhe Iranit mbeten të larta, ndërsa ambasadori amerikan në Turqi dhe i dërguari i posaçëm për Sirinë, Tom Barrack, ka deklaruar se një sulm amerikan ndaj Teheranit mund të ndodhë që këtë fundjavë.
Gjatë një interviste me influencuesin Mario Nawfal, Barrack u pyet nëse Shtetet e Bashkuara mund të ndërmarrin një operacion ushtarak kundër Iranit brenda ditëve të ardhshme. “A mund të ndodhë një sulm këtë fundjavë? Sigurisht”, u përgjigj ai, duke mos e përjashtuar këtë skenar.
Megjithatë, diplomati amerikan theksoi se presidenti Trump vazhdon të jetë i hapur ndaj një marrëveshjeje me Iranin. Sipas tij, Uashingtoni dhe Teherani kanë zhvilluar negociata prej muajsh, pavarësisht tensioneve mes dy vendeve.
I pyetur nga gazetaret për deklaratën e Barrack, presidenti amerikan u shfaq i rezervuar dhe tha se nuk ishte në dijeni të një plani të tillë. “E tha këtë ambasadori ynë në Turqi? Ai është një njeri shumë i fuqishëm. Nuk kam dijeni për diçka të tillë”, deklaroi Trump.
Këto deklarata vijnë në një kohë kur bisedimet mes Uashingtonit dhe Teheranit kanë ngecur, pas përskallëzimit të konfliktit dhe sulmeve amerikano-izraelite ndaj Iranit. Trump ka deklaruar disa herë se do të marrë një vendim lidhur me Iranin, por ka lenë të kuptohet se një vendim i tillë mund të shtyhet deri pas zgjedhjeve të mesmandatit në SHBA, të planifikuara për më 3 nëntor.