Trump lehtëson tarifat për disa produkte kanadeze në prag të zgjedhjeve të mesmandatit

Administrata e Donald Trump njofton lehtësimin e tarifave për një sërë produktesh nga Kanadaja, pas presionit të senatorëve republikanë dhe në prag të zgjedhjeve që do të përcaktojnë kontrollin e Kongresit amerikan. Sipas njoftimit të Shtëpisë së Bardhë, duke nisur nga 30 tetori, lehtësimi do të përfshijë produkte të caktuara, si fletët e kompensatës, disa produkte letre, makineri të caktuara dhe pajisje frigoriferike. Tarifat do të hiqen gjithashtu për disa arka dhe kuti ambalazhimi, ndërsa për produkte të tjera, përfshirë qilimat dhe disa mbetje, do të vendosen tarifa të reja. Senatorja republikane Susan Collins, e cila po përballet me një garë të ngushtë për të mbajtur mandatin në shtetin e Maine, deklaroi se kishte kërkuar vazhdimisht nga zyrtarët e lartë të administratës Trump lehtësimin e tarifave. Sipas saj, përjashtimet e reja do të ndihmojnë sektorët bujqësorë të shtetit, përfshirë prodhuesit e boronicave, patateve, mollëve dhe algave detare. Vendimi vjen në një moment të ndjeshëm politik, pasi zgjedhjet e mesit të mandatit do të përcaktojnë nëse republikanët apo demokratët do të kontrollojnë Kongresin amerikan, duke ndikuar drejtpërdrejt në dy vitet e fundit të mandatit të Trump. Tarifat amerikane ndaj mallrave kanadeze u vendosën pasi negociatat tregtare mes dy vendeve dështuan në gusht. Masa preku mallra me vlerë rreth 20 miliardë dollarë, ndërsa Kanadaja iu përgjigj me kundërmasa ndaj produkteve amerikane. Muajin e kaluar, kryeministri kanadez Mark Carney vendosi tarifa kundërpërgjigjëse në të njëjtën masë monetare me ato amerikane, duke i cilësuar si të nevojshme për mbrojtjen e punonjësve kanadezë. Presidenti Trump i kishte justifikuar tarifat amerikane me atë që e përshkroi si trajtim të pabarabartë të produkteve amerikane, veçanërisht në sektorët e automobilave, produkteve të qumështit dhe alkoolit. Në reagimin e saj, Shtëpia e Bardhë deklaroi se vendimi është pjesë e përpjekjeve të vazhdueshme të presidentit për të mbrojtur punonjësit amerikanë dhe për të garantuar tregti të drejtë. Ndërkohë, ministri kanadez përgjegjës për tregtinë e brendshme, Dominic LeBlanc, tha se Kanadaja do t’i vlerësojë masat e fundit, duke mbetur e gatshme për negociata konstruktive dhe me mirëbesim, me synimin për një marrëdhënie tregtare më të dobishme për të dyja palët. Kundërshtari demokrat i Collins në garën për Senatin, Troy Jackson, kritikoi përpjekjet e saj për të marrë meritat për lehtësimin e tarifave. Ai argumentoi se lufta tregtare e nisur nga Trump ka rritur vështirësitë ekonomike dhe kostot për banorët e Maine. Shteti verilindor amerikan kufizohet me provincat kanadeze New Brunswick dhe Quebec, ndërsa ekonomia e tij është e lidhur ngushtë me tregtinë ndërkufitare. Efektet e konfliktit tregtar janë ndier edhe në shtete të tjera amerikane me ekonomi të varura nga shkëmbimet me Kanadanë. Edhe republikani Mike Rogers, ligjvënës nga Michigan, ka kërkuar që Trump t’i japë fund përplasjes tregtare, pasi më herët kishte mbështetur politikën tarifore në reklama politike në shtetin e tij. Presidenti Trump deklaroi të premten se Kanadaja po punon intensivisht për arritjen e një marrëveshjeje tregtare me SHBA-në. Kryeministri Carney konfirmoi se Otava mbetet e hapur për një marrëveshje të dobishme për të dyja vendet, por theksoi se nuk do të nxitojë për të pranuar kushte që nuk i shërbejnë interesave kanadeze. Sipas transmetuesit kanadez CBC, Carney u shpreh se një marrëveshje mund të arrihej menjëherë nëse pala amerikane do të ishte e gatshme, por shtoi se Kanadaja mund të presë muaj të tërë, apo edhe një administratë tjetër amerikane, për të siguruar një marrëveshje të drejtë. Ndërkohë, LeBlanc bëri të ditur se një delegacion kanadez është takuar me anëtarë të Komitetit Këshillimor për Marrëdhëniet Ekonomike Kanada–SHBA. Takimi i së enjtes ishte i nënti që nga prilli i vitit 2026 dhe në fokus kishte ndikimin e vazhdueshëm të tarifave amerikane në ekonominë kanadeze. Lehtësimi i pjesshëm i tarifave shënon një zhvillim të ri në marrëdhëniet tregtare mes dy vendeve, por mbetet e paqartë nëse ai do të hapë rrugën për një marrëveshje më të gjerë që do t’i japë fund përplasjes ekonomike mes Uashingtonit dhe Otavës.