Kubani: SHBA fton kubanët të bashkëpunojnë me CIA-n, Havana ironizon Uashingtonin
Qeveria kubaneze ka reaguar me ironi ndaj thirrjes publike të Shteteve të Bashkuara të Amerikës për të bashkëpunuar me Agjencinë Qendrore të Inteligjencës (CIA).
Zëvendësministri i Jashtëm kubanez, Carlos Fernandez de Cosio, ka ironizuar metodat e rekrutimit të inteligjencës amerikane, duke vënë në dyshim efektivitetin e tyre. “Tani SHBA-të po përdorin reklama publike për rekrutim në CIA”, shkroi diplomati kubanez në një postim në platformën X. Ai shtoi se kjo mënyrë rekrutimi mund të tregojë dëshpërim të madh ose vështirësi financiare brenda agjencisë amerikane, duke e krahasuar promovimin e bashkëpunimit me CIA-n me reklamimin e një produkti të zakonshëm tregtar, si pasta e dhëmbëve. Reagimi i Havanës vjen pasi autoritetet amerikane u janë drejtuar publikisht qytetarëve kubanë, duke i ftuar të ndajnë informacione me shërbimet amerikane të inteligjencës. Kjo nismë është shndërruar në një tjetër pikë përplasjeje mes Uashingtonit dhe Havanës, ndërsa administrata amerikane vijon të ushtrojë presion ndaj qeverisë komuniste të Kubës.