Studentët dhe pedagogët mblidhen në Tiranë për protestën kombëtare
Studentët dhe pedagogët nga i gjithë vendi mblidhen në Tiranë për të mbështetur protestën kombëtare, e cila shënon ditën e 12-të të protestës studentore. Pjesëmarrja pritet edhe nga studentët e rretheve dhe shqiptarët nga diaspora.
Sot është e shtunë dhe shënon ditën e 12-të të protestës studentore, ku për sot është thirrur për një tubim kombëtar në kryeqytet. Studentët dhe pedagogët janë solidarizuar dhe mblidhen në Tiranë për të mbështetur protestën. Pjesëmarrja pritet edhe nga studentët e rretheve dhe shqiptarët nga diaspora.
Sindikata e Pavarur e Artit, Kulturës dhe Medias e Shqipërisë ka njoftuar se do t’i bashkohet protestës kombëtare të 24 tetorit, në solidaritet me studentët, të rinjtë dhe qytetarët. Përmes një thirrjeje publike, sindikata fton anëtarët e saj, artistët dhe punonjësit e kulturës e medias të mblidhen nesër në orën 11:00 përpara Kryeministrisë.
Në orën 14:00 është paralajmëruar bashkimi i grupeve të studentëve në tubimin përpara Kryeministrisë. Mobilizimi për protestën kombëtare po zhvillohet edhe jashtë Tiranës. Studentët e rretheve, të cilët gjatë javës kanë protestuar në qytetet ku ndodhen universitetet e tyre, pritet të udhëtojnë sot drejt kryeqytetit për t’iu bashkuar tubimit.
Gjithashtu në shesh do të mblidhen edhe shqiptarët nga diaspora. Pavarësisht thirrjeve të kryeministrit Edi Rama për dialog, protestuesit vijojnë të këmbëngulin te kërkesa për dorëheqjen e tij.