Studentët dhe pedagogët do të mblidhen në Tiranë për një protestë kombëtare

Studentët dhe pedagogët do të mblidhen në Tiranë për një protestë kombëtare më 24 tetor, duke u bashkuar me sindikata, përqendrimet e biznesit të vogël dhe qytetarët nga qytetet e ndryshme të vendit. Aktivitetet mbështetëse do të fillojnë që në orën 10:00, kur pedagogët do të mblidhen pranë Universitetit Politeknik, ndërsa një orë më vonë, në orën 11:00, përqendrimet e artit, kulturës dhe medias do të grumbullohen përpara Kryeministrisë.

Sindikata e Pavarur e Artit, Kulturës dhe Medias së Shqipërisë ka konfirmuar pjesëmarrjen në protestë, duke ftuar anëtarët dhe punonjësit e këtyre sektorëve të solidarizohen me studentët dhe të rinjtë. Në thirrjen e saj, sindikata vë theksin të përgjegjësisë qytetare dhe mbrojtja e të drejtave të punonjësve.

Në mbështetje të tubimit është pozicionuar edhe Partia Demokratike, e cila u ka kërkuar aktivistëve dhe forumeve të saj të dalin në protestë në orën 12:00.

Bashkimi i grupeve studentore përpara Kryeministrisë është parashikuar për në orën 14:00, ndërsa pjesëmarrja pritet të përfshijë edhe studentët nga rrethet.

Gjatë ditëve të fundit, studentët në qytetet universitare jashtë Tiranës kanë zhvilluar protesta dhe tashmë po koordinohen me grupet studentore të kryeqytetit për të organizuar udhëtimin dhe pjesëmarrjen në tubimin kombëtar.