Ermal Beqiri në burg, kërkesa për ekstradim s’u plotësua, Francës i rrëzon argumentet e Shqipërisë
Ermal Beqiri, biznesmeni shqiptar, mbetet në burg në Francë, pasi kërkesa e Shqipërisë për ekstradimin e tij nuk u plotësua. Gjykata franceze shqyrtoi dokumentacionin shtesë të dërguar nga autoritetet shqiptare, por avokati i Beqirit kundërshtoi vlefshmërinë e tyre.
Gjykata e Amiens ka vendosur që Ermal Beqiri të qëndrojë në burg, në pritje të një vendimi përfundimtar nëse do t’u dorëzohet autoriteteve shqiptare. Beqiri u paraqit para gjykatës franceze të premten, më 23 tetor, dhe kundërshtoi ekstradimin drejt Shqipërisë, duke pretenduar se çështja ndaj tij ka prapavijë politike.
Avokati i tij, Nicolas Paganelli, kundërshtoi vlefshmërinë e dokumenteve të dërguara nga Shqipëria, duke i cilësuar të paplota dhe duke vënë në dyshim besueshmërinë e garancive të ofruara. “Janë drafte, nuk është punë serioze. Ju nuk jeni shërbimi i asistencës pas shitjes për garanci diplomatike të paplota”, deklaroi avokati.
Edhe vetë Beqiri hodhi akuza ndaj drejtësisë shqiptare, duke pretenduar se procedimi ndaj tij është politik. “Nëse kam korruptuar dikë, ai është shteti. Por askush nuk është në burg. Gjithsesi, këtu ka një problem. Kjo çështje është thjesht politike”, u shpreh biznesmeni.
Në këtë çështje, Prokuroria e Përgjithshme në Amiens kërkoi miratimin e ekstradimit, duke argumentuar se gjykata franceze nuk ka për detyrë të vlerësojë funksionimin e sistemit gjyqësor shqiptar. Ermal Beqiri u arrestua fillimisht në Francë pasi fluturoi me avionin e tij privat në lartësi të ulët mbi centralin bërthamor Penly. Për këtë incident, ai u dënua me një gjobë prej 7 mijë eurosh, por mbeti në paraburgim për shkak të kërkesës së ekstradimit të paraqitur nga Shqipëria.
Autoritetet franceze i kanë sekuestruar gjithashtu pasuri të konsiderueshme, përfshirë një kështjellë të shekullit XVI pranë Parisit, llogari bankare me mbi 2.1 milionë euro, dy apartamente në jug të Francës, automjete, një jaht dhe një avion të lehtë. SPAK e kërkon biznesmenin në kuadër të hetimeve për tenderët e AKSHI-t, ku ndaj tij janë ngritur akuza për një sërë veprash penale, mes të cilave korrupsion aktiv, pastrim parash, shkelje të barazisë në tenderë, heqje të paligjshme të lirisë dhe përfshirje në grup të strukturuar kriminal.
Beqiri vijon të mbahet në burgun e Beauvais, ndërsa pritet vendimi i drejtësisë franceze për ekstradimin e tij në Shqipëri.