Vetëm 9 persona mbeten në qeli pas operacionit antidrogë në Sarandë dhe Ksamil
Gjykata e Sarandës dhe ajo e Apelit kanë liruar nga qelia mbi gjysmën e personave të arrestuar pas një operacioni antidrogë në Sarandë dhe Ksamil.
Me vendime të njëpasnjëshme, Gjykata e Sarandës dhe ajo e Apelit kanë liruar nga qelia mbi gjysmën e personave të arrestuar pas një operacioni antidrogë të zhvilluar më 5 shtator të këtij viti në Sarandë e Ksamil. Operacioni kishte në shënjestër shpërndarësit e lëndëve narkotike kanabis dhe kokainë, të cilët ishin hetuar me metoda proaktive për mbi një muaj, ndërsa gjatë ndërhyrjes policore u zbuluan edhe dy armë. Sipas dosjes hetimore, për identifikimin e shpërndarësve ndihmoi edhe një person, të cilin policia e kishte përdorur për të kryer blerje të simuluara.
Për zbatimin e veprimeve simuluese për këtë operacion, organi i prokurorisë kishte autorizuar oficerin e policisë gjyqësore në Seksionin për Hetimin e Krimeve në Komisariatin e Policisë Sarandë, me emrin e koduar ‘Tatuazhi’, si dhe shtetasin e koduar sipas marrëveshjeve përkatëse, datë 22.07.2026 dhe 13.08.2026, ‘Për blerje të simuluar’, me emrin ‘Tatuazhi’.
Por mbi një muaj pas operacionit, ku u sekuestruan doza të vogla kanabisi dhe kokaine, dy armë dhe një sasi e vogël të hollash, në qeli ndodhen vetëm 9 persona nga 20 të arrestuar fillimisht me urdhër të Prokurorisë. Andrea Babi, Bledar Kovaci, Elvis Demcaj, Nikolin Rakipi dhe Flatun Lalaj u lanë në “arrest shtëpie” tre ditë pas operacionit. Më 15 tetor, Gjykata e Apelit la në “arrest shtëpie” edhe Arlind Osmanin, Redian Arizin, Xhuliano Mejdin, Nazif Refitajn dhe Korado Omerin, ndërsa më 21 tetor, Gjykata e Sarandës la në “arrest shtëpie” Klerjan Popshinin.
Aktualisht, në qeli kanë mbetur vetëm Feliks Filja, Altin Arapi, Erjon Dido, Medi Myftaraj, Dhimitri Terolli, Fabjo Berhamaj, Vasil Kaci, Devis Saliaj dhe Shefqet Bezhani. Këtyre dy të fundit, gjatë operacionit, iu sekuestruan edhe armë zjarri.
Mes personave që kanë mbetur në burg, çuditërisht, rezulton edhe Dhimitri Terolli, i cili njihet si përdorues i drogave shumë të forta dhe është ekzaminuar për një kompleks sëmundjesh. Gjithashtu, përdorues i njohur i drogës, i cili mbahet në burg, rezulton edhe Erjon Dido.