Franca në alarm, sot protesta masive një javë pas trazirave të dhunshme

Franca është në gatishmëri të lartë për protestat e reja që pritet të zhvillohen këtë të shtunë në Paris dhe qytete të tjera të vendit, vetëm një javë pas trazirave të rënda që shkaktuan dëme të mëdha materiale dhe përplasje me policinë. Pavarësisht kufizimeve të vendosura nga autoritetet, qindra mijëra persona pritet të dalin në rrugë, në kuadër të protestave të organizuara nga studentët, sindikatat dhe grupet kundër qeverisë. Për të përballuar situatën, Ministria e Brendshme ka njoftuar angazhimin e 70 mijë efektivëve të policisë në të gjithë vendin. Ministri i Brendshëm, Laurent Nuñez, paralajmëroi se autoritetet do të reagojnë ashpër ndaj çdo akti dhune, vandalizmi apo plaçkitjeje. “Do të jemi të pakompromis me vandalët, plaçkitësit dhe të gjithë ata që kryejnë akte dhune”, deklaroi Nuñez, duke shtuar se në rrjetet sociale janë evidentuar edhe thirrje për dhunë nga grupe të së majtës radikale. Masat e sigurisë vijnë pas trazirave të 17 tetorit, gjatë të cilave protestuesit dhe personat e përfshirë në akte dhune dëmtuan biznese dhe ndërtesa publike, ndërsa disa objekte u dogjën. Në qytete të ndryshme, policia u përball me vështirësi për të kontrolluar situatën. Sipas ministrit të Drejtësisë, Gérald Darmanin, 232 persona janë burgosur për përfshirjen e tyre në trazirat e javës së kaluar, ndërsa më shumë se 1.100 persona janë paraqitur para gjykatave. Rreth 260 raste lidhen me akuza për veprimtari të organizuar kriminale. Autoritetet kanë vendosur kufizime të forta për demonstratat. Presidenti Emmanuel Macron ka njoftuar se do të lejohen vetëm protestat e organizuara nga sindikatat e njohura, ndërsa disa qytete, përfshirë Lionin, Nicën dhe Montpelierin, kanë shpallur ndalime të përgjithshme për grumbullimet. Megjithatë, organizatorët nuk kanë hequr dorë nga planet e tyre dhe qindra protesta janë planifikuar në të gjithë Francën. Në Marsejë, pas një ndalimi fillestar, autoritetet kanë lejuar zhvillimin e një marshimi të organizuar nga sindikatat. Në Paris, marshimi i studentëve dhe sindikatave do të zhvillohet në një itinerar që shmang qendrën e qytetit. Ndërkohë, disa prej zonave më të njohura të kryeqytetit janë përgatitur për mundësinë e trazirave të reja. Muzetë e Luvrit, Orse-së dhe Pikasos do të qëndrojnë të mbyllur të shtunën, ndërsa një ndeshje e planifikuar e Paris Saint-Germain është shtyrë për të hënën. Disa biznese kanë mbuluar vitrinat me dërrasa nga frika e plaçkitjeve. Protestave pritet t’u bashkohen edhe mbështetës të lëvizjes “Jelekët e Verdhë”, e cila në të kaluarën ka organizuar demonstrata masive kundër politikave të Macronit. Një faqe interneti e lidhur me këtë lëvizje ka publikuar më shumë se 500 protesta të planifikuara dhe rreth 200 aksione të tjera, duke kërkuar dorëheqjen e presidentit francez. Kriza e fundit vjen në një moment kur pakënaqësia e qytetarëve është rritur për shkak të kostos së lartë të jetesës dhe shqetësimeve për gjendjen ekonomike të vendit. Franca përballet gjithashtu me borxh në rritje dhe paralajmërime se qeveritë e ardhshme mund të detyrohen të shkurtojnë ndjeshëm shpenzimet publike. Situata është komplikuar edhe nga përplasjet politike, ndërsa vendi po përgatitet për zgjedhjet e ardhshme presidenciale. Sondazhet sugjerojnë se kandidati i kampit centrist të Macronit mund të mos arrijë në raundin e dytë, duke hapur mundësinë e një përballjeje mes së djathtës ekstreme dhe së majtës radikale. Jean-Luc Mélenchon, lideri i partisë “Franca e Papërkulur”, ka kritikuar mënyrën se si policia ka menaxhuar protestat dhe ka akuzuar Macronin se po dëmton institucionet republikane. Ai u ka bërë thirrje mbështetësve të tij të marrin pjesë në demonstratat e së shtunës, ndërsa ka dënuar aktet e dhunës që shoqëruan protestat e mëparshme. Një tjetër pikë e nxehtë pritet të jetë qyteti i Orléans, ku partia e ekstremit të djathtë “Tubimi Kombëtar” do të zhvillojë një konferencë dyditore, ku pritet të marrë pjesë edhe liderja e saj, Marine Le Pen. Grupet e majta kanë paralajmëruar mobilizim në qytet, duke rritur frikën për përplasje mes palëve. Kryetari i bashkisë së Orléans ka deklaruar se numri i pjesëmarrësve të pritshëm është i paprecedentë. Për këtë arsye, mijëra efektivë policie do të angazhohen për të garantuar sigurinë, ndërsa transporti publik do të pezullohet. Marine Le Pen, e cila kandidon për herë të katërt për presidencën franceze, shihet nga sondazhet si një nga pretendentet kryesore për të fituar zgjedhjet. Megjithatë, ajo përballet me një proces gjyqësor për përvetësimin e fondeve të Bashkimit Evropian. Le Pen i ka mohuar akuzat dhe ka apeluar vendimin e gjykatës. Autoritetet franceze mbeten në gatishmëri, ndërsa vendi përgatitet për një tjetër ditë protestash, në një klimë të tensionuar sociale dhe politike.