Policia paralajmëron për molotovë dhe sulme ndaj efektivëve
Policia e Shtetit ka përforsuar masat e sigurisë në Tiranë për protestën e paralajmëruar për ditën e sotme, pas konstatimit të thirrjeve në rrjetet sociale për grumbullimin e personave të maskuar dhe përdorimin e mjeteve të rrezikshme gjatë tubimit.
Policia e Shtetit ka nisur procedimin penal për thirrjet për sulme ndaj punonjësve të policisë, djegie të automjeteve dhe dëmtimin e pronës publike dhe private. Strukturat e specializuara po punojnë për identifikimin e personave përgjegjës dhe vënien e tyre para pergjegjësisë ligjore.
Policia ka bërë thirrje qytetarëve të mos përfshihen në veprimet e paligjshme dhe prindërit të shmangin ekspozimin e fëmijëve në situatat e rrezikshme. Gazetarët dhe operatorët mediatikë që raportojnë nga terreni të respektojnë perimetrat e sigurisë të përcaktuar nga Policia dhe udhëzimet e punonjësve të Policisë.
Policia garanton qytetarët se shërbimet e Policisë në terren do të veprojnë në përputhje me ligjin, duke respektuar parimin e proporcionalitetit në reagimin ndaj çdo akti dhunë dhe paligjshmërie.