Protesta kombëtare zhvendoset në rrugën "Myslym Shyri" pas ndërhyrjes së policisë

Protesta kombëtare e kësaj të shtunë ka marrë një drejtim tjetër, ndërsa turma e protestuesve është larguar nga bulevardi "Dëshmorët e Kombit" dhe është zhvendosur drejt rrugës "Myslym Shyri". Lëvizja e protestuesve vjen pas ndërhyrjes së fortë të policisë para Kryeministrisë, ku u përdoren sasi të mëdha gazi lotësues dhe ujë me presion për shpërndarjen e turmës.

Forcat e rendit janë vënë në ndjekje të protestuesve, duke lëvizur pas tyre në drejtim të rrugës "Myslym Shyri", ndërsa situata mbetet e tensionuar. Pak më herët, bulevardi ishte mbuluar nga re të dendura gazi lotësues, që vështirëson qëndrimin e qytetarëve në zonë dhe shkakton zhvendosjen e grupeve të protestuesve në rrugët përreth.

Protesta e sotme, e organizuar si tubim kombëtar në ditën e 12-të të revoltës studentore, kishte mbledhur një numër të madh qytetarësh në qendër të kryeqytetit. Turma ishte shtrirë nga Kryeministria deri te Ministria e Brendshme, para se të nisnin përplasjet me policinë.

Studentët, të mbështetur nga qytetarët shumë, vijojnë të kërkojnë dorëheqjen e kryeministrit Edi Rama, duke refuzuar ftesat e tij për dialog. Zhvendosja drejt rrugës "Myslym Shyri" tregon se protesta po vijon edhe jashtë bulevardit, ndërsa forcat e policisë po ndjekin lëvizjet e turmës në rrugët e qendrës së Tiranës.