TIRANA 6 ORË MES KAOSIT DHE PËRPLASJEVE, RAMA I VENDOSUR TË MBAJË KARRIGEN ME FORCË

Tirana është përfshirë në një tjetër pasdite kaotike më shtunën e 24 tetorit. Për afro gjashtë orë, kryeqyteti është perfshirë nga përplasjet mes protestuesve dhe policisë, gaz lotsjellës, ujë me presion, fishekzjarrë dhe zjarre në kazanet e mbeturinave.

Pas tri-katër ditësh të cilave protestat kishin vijuar me tensione të ulëta, situata u përshkallëua sërish. Në ditën e 12-të të mobilizimit studentor, protesta mori përmase kombëtare, me pjesëmarrjen e një numri të madh qytetarësh që kërkojnë largimin e kryeministrit Edi Rama.

Gjithçka nisi pranë Ministrisë së Arsimit, ku u grumbulluan protestuesit, përpara se turma të zhvendosej drejt bulevardit “Dëshmorët e Kombit”. Qytetarët mbushën hapësirën nga Kryeministria deri në drejtim të Ministrisë së Brendshme, ndërsa përballë tyre ishin vendosur forca të shumta policore.

Përplasjet nisën me ndërhyrjen e policisë, e cila përdori gaz lotsjellës dhe ujë me presion për shpërndarjen e turmës. Gjatë tensioneve pati edhe hedhje gurësh në drejtim të efektivëve.

Por ndërhyrjet nuk e ndalën protestën. Qytetarët u rigrupuan dhe vijuan marshimin nëpër rrugët e kryeqytetit. Nga bulevard, turma u zhvendos drejt sheshit “Skënderbej”, ku policia ndërhyri sërish me gaz lotsjellës. Më pas, protestuesit marshuan drejt Ushtarit të Panjohur dhe zonës së 9-katësheve.

Pavarësisht orëve të gjata të tensioneve, pjesëmarrja mbeti e lartë. Turma vijoi të mbushte rrugët e Tiranës, ndërsa trafiku u rënua ndjeshëm në disa akse.

Protestuesit u kthyen më vonë drejt qendrës, duke kaluar te dalja e Rruges së Durrësit, në drejtim të selisë së Partisë Socialiste. Aty u përballën me një tjetër kordon policor.

Fishekzjarrët e hedhur nga protestuesit dhe gazi lotsjellës i përdorur nga policia krijuan një tjetër situatë të tensionuar, duke mbuluar zonën me tym të dendur.

Më pas, forca të shumta policore ndërhyri në rrugën “Mine Peza”, ndërsa protestuesit u shpërndanë në rrugicat përreth. Tensionet u zhvendosën edhe pranë stadiumit “Dinamo”, ku policia ndërhyri dhe shoqëroi disa persona.

Gjatë protestës u plagos në sy edhe një i ri, i cili dyshohet se është goditur nga një plumb gome. Ai u transportua në Spitalin e Traumes për trajtim mjekësor.

Pas afro gjashtë orësh, turma nisi të shpërndahesh gradualisht nëpër rrugët dhe lagjet e kryeqytetit. Situata u qetësua, ndërsa policia nisi shoqërimet e protestuesve.

Por ajo që mbetet nga kjo e shtunë është përlasja e fortë mes revoltës qytetare dhe vendosmërisë së Edi Ramës për të mos lëshuar pushtetin.

Kryeministri vazhdon të flasë për dialog, ndërsa qytetarët që kërkojnë dorëheqjen e tij janë përballur për orë të tëra me gaz lotsjellës, ujëhedhëse dhe ndërhyrje policore.

Në vend të një zgjidhjeje politike për krizën e krijuar, kryeqyteti pa për afro gjashtë orë gaz, ujëhedhëse dhe forca policore që ndërhyrin në një zonë pas tjetrës. Rama e di se zgjidhja e kësaj situate është vetëm politike. Sot është dita e 12-të e protestës dhe Tiranë nuk mund të vijojë të digjet çdo ditë. Rruga me e lehtë është largimi i kryeministrit dhe gjithçka merr fund.