Zgjedhjet presidenciale në Bullgari, 6.5 milionë qytetarë pritet të votojnë

Zgjedhjet presidenciale në Bullgari do të mbajnë këtë të diel, ku rreth 6.5 milionë votues të regjistruar pritet të hedhin votën e tyre. Fushata zgjedhore është përqendruar kryesisht te tensionet në Detin e Zi dhe rritja e çmimeve të energjisë.

Në garë janë 27 kandidatë, por sondazhet sugjerojnë se asnjëri nuk pritet të sigurojë shumicën e nevojshme për të fituar që në raundin e parë. Sipas një sondazhi të Alpha Research, presidentja Iliana Yotova kryeson me 44.5% të mbështetjes, ndërsa ish-kryeministri Andrey Gyurov ndiqet me 26.1%. Kostadin Kostadinov, kreu i partisë nacionaliste Vuzrazhdane, renditet në vendin e tretë me 10.5%.

Yotova, ish-anëtare e Parlamentit Evropian, mori detyrën e presidentes në janar, pasi Rumen Radev dha dorëheqjen për t’u përfshirë në politikën parlamentare. Ajo kishte shërbyer më parë si nënkryetare gjatë dy mandateve presidenciale të Radevit. Kandidatura e Yotovës mbështetet nga partia Bullgaria Progresive, e udhëhequr nga Radev, e cila siguroi shumicën parlamentare në zgjedhjet e përgjithshme të prillit, duke i hapur rrugën atij për të marrë postin e kryeministrit në maj. Ndërkohë, partitë opozitare mbështesin kandidaturën e Gyurovit, ish-zëvendësguvernatorit të Bankës Qendrore të Bullgarisë.