Ferit Hoxha thotë shqiptarët e Luginës së Preshevës: Dilni dhe votoni!

Ministri i Evropës dhe Punëve të Jashtme, Ferit Hoxha, ka thirrur shqiptarët e Luginës së Preshevës të marrin pjesë në zgjedhjet e 25 tetorit, duke theksuar rëndësinë e votimit për përfaqësimin dhe mbrojtjen e të drejtave të tyre.

Përmes një postimi në rrjetin social X, Hoxha ka drejtuar qytetarët shqiptarë të Luginës së Preshevës, duke i inkurajuar të ushtrojnë të drejtën e votës. Ai ka theksuar se pjesëmarrja në procesin zgjedhor është jo vetëm një e drejtë themelore demokratike, por edhe një mundësi për të forcuar përfaqësimin politik dhe për të bërë që zëri i shqiptarëve të degjohet.

Sipas tij, një pjesëmarrje më e lartë në votime jep më shumë peshë kërkesave të shqiptarëve për të drejtat dhe ardhmen e tyre. "Çdo votë ka rëndësi. Sa më e madhe pjesëmarrja, aq më i fortë është zëri juaj për të drejtat, përfaqësimin dhe ardhmen e shqiptarëve në Luginën e Preshevës", shkruan ministri.

Sot, 25 tetor 2026, në Serbi zhvillohen zgjedhjet e parakohshme parlamentare, ku qytetarët votojnë për përbërjen e re të Kuvendit me 250 vende. Qendrat e votimit janë hapur në orën 07:00 dhe pritet të mbyllen në orën 20:00. Sipas të dhënave të raportuara, të drejta e votës e kanë rreth 6.45 milion qytetarë.

Në këto zgjedhje, partitë politike shqiptare nga Presheva, Bujanoci dhe Medvegja garojnë të bashkohen në një listë të vetme, të quajtur "Koalicioni Shqiptar", e cila kryesohet nga Shaip Kamberi dhe mban numrin 17 në fletën e votimit. Koalicioni përbëhet nga tetë subjekte politike shqiptare, të cilat arritën marrëveshjen për bashkëpunim më 29 shtator në Prishtinë. Lista është miratuar nga Komisioni Republikan i Zgjedhjeve në Serbi dhe gëzon statusin e listës së pakicës kombëtare shqiptare.

Përfaqësimi parlamentar i shqiptarëve të Luginës së Preshevës ka qenë një çështje e rëndësishme në zgjedhjet e mëparshme. Në vitin 2020, kur subjektet shqiptare garuan të bashkohen, arritën të siguronin tre mandate në Kuvendin e Serbisë. Në zgjedhjet e vitit 2023, lista e drejtuar nga Shaip Kamberi siguroi një mandat.