23 të lënduar në protestën e Tiranës, 6 policë dhe 3 gazetarë

Ministria e Shëndetësisë dhe Mirëqenies Sociale ka bërë të ditur se 23 persona janë paraqitur në strukturat shëndetësore pas incidenteve të regjistruara gjatë protestës së 24 tetorit në Tiranë. Sipas bilancit të përditësuar mëngjesin e kësaj të diele, në orën 09:15, në Spitalin Universitar të Traumës kanë marrë ndihmë mjekësore 16 persona, mes të cilëve 12 protestues, dy përfaqësues të medias dhe dy efektivë policie.

Mes protestuesve të lënduar është edhe një i ri që pësoi dëmtim në sy gjatë protestës. Ministria njofton se ai është nënshtruar një ndërhyrjeje kirurgjikale urgjente gjatë ditës së sotme.

Për të përcaktuar vijimin e trajtimit, gjatë ditës së sotme pritet të zhvillohet një konsultë e zgjeruar mes mjekëve specialistë të Spitalit Universitar të Traumës dhe Qendrës Spitalore Universitare “Nënë Tereza”.

Ndërkohë, në QSUT janë paraqitur pesë persona të lënduar: një deputet i Kuvendit, një protestues, dy efektivë policie dhe një përfaqësues i medias. Sipas ministrisë, të gjithë kanë marrë trajtimin e nevojshëm dhe janë larguar nga ambientet e spitalit.

Gjithashtu, në Poliklinikën e Specialiteteve Nr. 2 në Tiranë kanë kërkuar ndihmë mjekësore dy punonjës policie, të cilët pas trajtimit janë larguar nga institucioni shëndetësor.

Në total, sipas të dhënave paraprake të Ministrisë së Shëndetësisë, gjatë protestës janë lënduar 13 protestues, 6 efektivë policie, 3 përfaqësues të medias dhe një deputet.