Franca në zezë nga protestat, 70 mijë policë në terren, gati 1 mijë persona në pranga

Protestat në Francë vazhdojnë të jenë të intenzive, me mbi 410 mijë persona që mblodhën në rrugë për të protestuar kundër rritjes së shpenzimeve të përditshme dhe për të ndryshuar kushtet në sistemin arsimor. Sipas Ministrisë së Brendshme franceze, në demonstratat morën pjesë rreth 410 mijë persona, ndërsa sindikatat raportuan një pjesëmarrje dukshëm më të lartë, prej rreth 800 mijë protestuesish.

Për të ruajtur rendin dhe sigurinë, autoritetet kishin mobilizuar rreth 70 mijë efektivë policie dhe kishin vendosur kufizime në disa qytete. Megjithëse pjesa më e madhe e marshimeve gjatë ditës u zhvillua në mënyrë paqësore, situata u tensionua në disa zona, ku grupe protestuesish u përplasën me policinë.

Në Paris, incidentet nisën në përfundim të një marshimi që kishte filluar pranë Portës së Italisë dhe përfundonte në zonën e Portës së Vincennes. Sipas raportimeve, disa persona të maskuar ngritën barrikada dhe hodhën sende drejt efektivëve. Policia ndërhyri me gaz lotsjellës, topa uji dhe shkopinj gome për të shpërndarë grupet e përfshira në incidente.

Tensione u regjistrua edhe në qytete të tjera. Në Marsejë, protestuesit u vunë flakën barrikadave, ndërsa në Bordeaux u raportua dëmtimi i një ndërtese, prej së cilës u morën dërrasa që më pas u përdoren për të bllokuar rrugët.

Protestat nxorën sërish në pah pakënaqësitë e qytetarëve për rritjen e shpenzimeve të përditshme dhe gjendjen e arsimit, ndërsa ndërhyrja e policisë dhe arrestimet shënuan përshkallëzimin e situatës në disa qytete franceze.