Presidenti Duka: FSHF ofron ndihmë për trajtimin e Erjon Vishkullit
Presidenti i Federatës Shqiptare të Futbollit, Armand Duka, ka konfirmuar se FSHF do të ofrojë ndihmë për trajtimin e Erjon Vishkullit, tifozit kuq e zi që u plagos rëndë gjatë protestës.
Erjon Vishkulli, një nga pjesëmarrësit në protestën që kërkon dorëheqjen e kryeministrit Rama, u plagos rëndë teksa u godit në sy nga plumbat e gomës së policisë. 28-vjeçari është pjesë e grupimit ‘Tifozët Kuqezi’ në mbështetje të Kombëtares shqiptare dhe një ditë më parë iu nënshtrua një ndërhyrjeje kirurgjikale. Federata Shqiptare e Futbollit ka reaguar ndaj asaj që ndodhi dhe mori vendimin për të dhënë ndihmën e saj për trajtimin e tij. Presidenti i FSHF, Armand Duka, ka konfirmuar këtë vendim në një postim në rrjetet sociale. "Më ka prekur thellë plagosja e rëndë e Erjon Vishkullit. Po kështu, tifozët kuq e zi dhe mbështetësit e përkushtuar të kombëtares sonë. Në këtë moment të vështirë, i shpreh Erjonit dhe familjes së tij afërsinë dhe solidaritetin tim. Federata Shqiptare e Futbollit është e gatshme të ofrojë ndihmë konkrete për trajtimin dhe rikuperimin e tij, në koordinim me familjen. Erjoni ka qenë pranë kombëtares me zemër e pasion. Sot, familja kuqezi është pranë tij. Nga zemra, shërim sa më të shpejtë, Erjon!" tha presidenti i FSHF në postimin e tij.