Rama nuk e vë ujin në zjarr për kërkesat për dorëheqjen e tij

Kryeministri Edi Rama nuk e vë ujin në zjarr për kërkesat për dorëheqjen e tij, duke deklaruar se kush mendon se mund ta imponojë dorëheqjen e tij me dhunë ose forma të tjera presioni gabon.

Rama tha se çdo qytetar ka të drejtë të kundërshtojë qeverinë, të kërkojë largimin e tij dhe të dalë në protestë, por sipas tij, kjo të drejtë nuk mund të përdoret për të cenuar liritë e tjerëve.

Kryeministri i bëri këto deklarata gjatë prezantimit të paketës së re ligjore kundër dhunës urbane, një ditë pas protesteve shoqëruar me incidente në Tiranë.

"Kush nuk e do qeverinë apo do largimin tim, jo sot, por dje, është në lirinë dhe të drejtën e tij ta mendojë, ta thotë, ta propagandojë dhe ta kthejë në protestë. Deri këtu është detyra ime dhe e qeverisë të garantojë se protesta e kujtdo ndaj kujdo që të zhvillohet pa asnjë trysni", deklaroi Rama.

Ai u shpreh gjithashtu i gatshëm të takohet me qytetarët që kundërshtojnë qeverinë dhe të dëgjojë drejtpërdrejt kërkesat e tyre.

Megjithatë, kryeministri theksoi se kërkesat për dorëheqjen e tij nuk mund të imponohen me dhunë apo me forma të tjera presioni.

"Unë mendoj se kush kërkon dorëheqjen time gabon duke menduar se mund ta imponohet me dhunë apo çdo formë tjetër, por nuk mendoj se ka gabim çdo gjë që thotë", u shpreh ai.

Rama shtoi se e konsideron përgjegjësinë e tij mbrojtjen e vendit dhe qytetarëve nga çdo përpjekje që, sipas tij, synon ta kthejë Shqipërinë pas.

"Unë kam detyrë të mbroj vendin dhe njerëzit nga çdo përpjekje që kërkon ta kthejë Shqipërinë mbrapa", deklaroi kryeministri.

Ndërkohë, protestuesit vijojnë të kërkojnë largimin e tij nga drejtimi i qeverisë, ndërsa Rama ka zgjedhur të theksojë se e drejta e protestës duhet të ushtrohet pa dhunë dhe pa cenuar rendin publik.