Bardhi: Paketa ligjore për protestat është antikushtetuese, nuk do të realizohet

Kryetari i Grupit Parlamentar të PD-së, Gazment Bardhi, ka reaguar ndaj deklaratave të kryeministrit Edi Rama, duke e akuzuar atë për përpjekje për të penguar protestat e studentëve dhe të rinjve me masa ligjore. Bardhi ka përdorur tone të ashpra ndaj kryeministrit, duke deklaruar se paketa e paralajmëruar është në kundërshtim me Kushtetuten.

"Sapo shpalli diktaturën! Të paktën në mendjen e tij të semurë. Sepse harron një gjë: shqiptarët nuk do të pranojnë kurrë të kthehen 36 vite pas, vetëm për të mbrojtur karrigen e Edi Ramës", u shpreh Bardhi.

Sipas deputetit demokrat, kryeministri ka marrë përsipër përgjegjësinë për atë që ai e cilëson dhunë policore ndaj studentëve dhe të rinjve, ndërsa e akuzoi se po paralajmëron masa ndëshkuese ndaj protestuesve.

"Edi Rama mori përsipër përgjegjësinë për dhunën policore ndaj studentëve dhe të rinjve, ndërsa paralajmëroi se do të nxjerrë sytë kujt do të proteston. Do të mbyllë gojën kujt do. Do të burgosë këdo. Do të gjobisë këdo", deklaroi Bardhi.

Ai pretendon se qëndrimi i kryeministrit lidhet me shqetësimin e këtij të fundit për protestat studentore, të cilat, sipas Bardhit, shihen nga Rama si një sfidë e drejtpërdrejtë ndaj pushtetit të tij.

Në vijim, kreu i Grupit Parlamentar demokrat kundërshtoi kategorikisht paketin ligjor të paralajmëruar, duke pretenduar se dispozitat e saj cenojnë të drejtat kushtetuese.

"Asgjë nga ato që tha nuk ka për të realizuar. Çdo gërma e paketës ‘Kundër Studentëve’ është antikushtetuese", theksoi ai.

Bardhi deklaroi se asnjë masë apo paralajmërim i qeverisë nuk do të ndalojë, sipas tij, kërkesat e qytetarëve për liri, drejtësi dhe demokraci.

"Edi Rama është një kryeministër politikisht i mbaruar. Numërimi mbrapsht ka nisur. Asnjë kërcënim nuk do ta ndalë vullnetin e qytetarëve për mirëqeverisje, liri, drejtësi dhe demokraci", shprehet Bardhi.