Rama prezanton masat për të parandaluar dhunën gjatë protestave

Kryeministri Edi Rama ka prezantuar një paketë të re ndryshimesh ligjore për të parandaluar dhe ndëshkuar dhunën gjatë protestave dhe për të kompensuar bizneset që pësonin dëme materiale. Paketa përfshin një akt normativ për dëmshpërblimin e menjëhershëm të biznesit të vogël, një ligj për riparimin e dëmeve, disa ndryshime në ligjin "Për tubimet", një Regjistr Elektronik i Posaçëm për dhunuesit urbanë, një ndryshim në Kodin e Etikës së mësuesve dhe disa propozime për ndryshime në Kodin Penal të Republikës së Shqipërisë.

Sipas masave të prezantuara, shteti do të mbulojë nga 70% deri në 100% të dëmeve materiale të shkaktuara nga dhuna, për bizneset me xhiro vjetore deri në 140 mijë euro, sipas kriterave të percaktuara. Bizneset që kanë aplikuar pranë Tatimeve nuk do të duhet të presin përfundimin e proceseve gjyqësore.

Personat që shkaktojnë dëme gjatë tubimeve do të mbajnë përgjegjësi financiare. Edhe ata që qëndrojnë në turma të dhunshme pas paralajmërimeve të policisë mund të gjobiten deri në 500 mijë lekë. Për të miturit mbi 14 vjeç, gjobat paguhen nga prindërit ose kujdestaret.

Policia mund të kufizojë tubimet deri në 72 orë pranë institucioneve të ndjeshme, kur ekziston rrezik real i dhunës. Parashikohen masa ndaj thirrjeve për dhunë në rrjetet sociale, gjoba 10-100 mijë lekë për tubimet pa leje dhe mosbindjen ndaj thirrjeve për largim, deri në 500 mijë lekë për mosbindjen ndaj urdhrit të shpërndarjes dhe fshehjen e identitetit, si dhe 5 mijë lekë për mosbindjen ndaj urdhrit të policisë.