Rama: Protestuesit që plagosën një 28-vjeçar në Tiranë janë "errësira që mbyllën dritën e syrit të tij"

Kryeministri Edi Rama ka reaguar sërish për protestën e dhunshme në Tiranë dhe plagosjen e 28-vjeçarit Erjon Vishkulli, i cili pësoi dëmtim në sy. Në një postim në rrjetin social X, Rama e cilësoi pjesëmarrjen në protesta të dhunshme si të rrezikshme dhe akuzoi nxitësit e dhunës për të përdorur rastin e të riut për të nxitur përplasje të mëtejshme.

Rama bëri gjithashtu me dije se është angazhuar personalisht për sigurimin e trajtimit të tij në një spital të specializuar në Itali, si dhe për transportin me avion mjekësor. Ai tha se pjesëmarrja në protestat e dhunshme është sigurisht e rrezikshme edhe për vetë dhunuesit dhe ata që rrinë rrotull tyre.

Rama tha se është keq kur kushdoqoftë lëndohet fizikisht, por se çdo lëndim i mundshëm mund të shmanget nëse dhuna e dikton natyrën e një proteste. Ai pyet retorikisht: "Kjo është një pyetje retorike dhe lëndimi i djalit nga Elbasani duhet të jetë një këmbanë alarmi për të gjithë, po mbi të gjitha për nxitësit e dhunës që propagandojnë nga ekranet e korruptuara televizive dhe nga pasqyrat e tyre sociale apo më zi akoma që paguajnë për mish për top lloj-lloj individësh, nga kriminelë, te djem të paditur e deri te fëmijë të mitur".

Rama u them të gjithë atyre që po e keqpërdorin si të tërbuar syrin e plagosur të tij për të nxitur më tej dhunën: "Ju jeni errësira që i mbylli atij djali dritën e syrit! Ju jeni gishtat dhe thonjtë e dorës së malkimit që e përndjek Shqipërinë qysh në 1912-ën, duke ia mbyllur sytë sa herë ky vend sheh dritë! Po këtë herë jeni të humbur, sepse drita e Shqipërisë është sot ku e ku më e madhe se sa errësira dhe ju jeni gjithnjë e më pak, prandaj edhe po dhunoni, digjni e shkatërroni me urrejtjen e pangushëllueshme të asaj dore, por duke ua kujtuar më mirë se kurrë shqiptarëve se kush jeni. Dhe shqiptarët s’do t’ua falin. Prisni dhe shikoni".