Meloni mund të japë dorëheqjen në mars, sipas La Repubblica

Kryeministrja italiane Giorgia Meloni mund të japë dorëheqjen në mars të vitit 2027, sipas raportimit të gazetës italiane La Repubblica. Ky skenar është diskutuar nga Meloni me aleatët e saj në qeveri, Antonio Tajani, Matteo Salvini dhe Maurizio Lupi.

Samiti evropian në Romë, i parashikuar për të shenuar 70-vjetorin e nënshkrimit të Traktateve të Romës, mund të shërbejë si momenti i fundit i rendësishëm për kryeministren përpara se të kërkojë Presidentit të Republikës shpërndarjen e Parlamentit dhe caktimin e zgjedhjeve të parakohshme.

Data e pare e mundshme për votimet do të ishte 16 maji 2027, ndërsa skenari që konsiderohet më i mundshëm është zhvillimi i zgjedhjeve parlamentare dhe atyre lokale në të njëjtin ditë, gjatë muajit qershor.

Bashkimi i dy proceseve zgjedhore do të ishte një mundësi për të organizuar votimet e parakohshme, disa muaj përpara përfundimit të mandatit aktual parlamentar, që pritet në vjeshtën e vitit 2027.

Megjithatë, drejtuesit e koalicionit të djathtë vazhdojnë të deklarojnë publikisht se zgjedhjet do të zhvillohen në afatin e zakonshëm. Për momentin, nuk ka njoftim zyrtar për dorëheqjen e Melonit apo për caktimin e zgjedhjeve të parakohshme.

Paralelisht me diskutimet për zgjedhjet parlamentare, kampi i djathtë në Itali ka përshpejtuar punën për përzgjedhjen e kandidatëve për zgjedhjet lokale në qytetet kryesore të vendit.

Sipas raportimit, mes qyteteve ku pritet të zhvillohet një garë e rendësishme janë Roma, Milano, Napoli, Torino dhe Bolonja. Përzgjedhja e kandidatëve ka sjellë diskutime brenda partive të koalicionit, ndërsa drejtuesit synojnë të gjejnë një marrëveshje përpara se fushata zgjedhore të hyjë në fazën intensive.