Ekspozita e librit që thyen izolimin dhe zbulon një histori të harruar në Shqipëri

Në një Shqipëri të izoluar nga bota perëndimore, librat u bënë një prej dritareve përmes të cilave hynin ide, kultura dhe letërsi nga kontinente të largëta. Mes tyre ishte edhe letërsia amerikano-latine, prania e së cilës në regjimin komunist, por edhe lidhja e saj me propagandën ideologjike të kohës, vjen në vëmendje përmes një ekspozite të veçantë që u çel në mjediset e Vendit të Dëshmisë dhe Kujtesës, e cila rrëfen një kapitull pak të njohur të historisë kulturore shqiptare.

Mes botimeve të ekspozuara janë veprat e shkrimtarëve të njohur si Pablo Neruda dhe Zhorzh Amado, por spikat përkthimi i romanit “Dasma” te Ismail Kadare, në Argjentinë. “Projekti nisi disa vite më parë dhe në fokus ka ndikimin e letërsisë amerikano-latine në Europë gjatë periudhës socialiste. Por rasti i Shqipërisë së diktaturës na bëri veçanërisht përshtypje. Është një rast shumë domethënës për të kuptuar se si një vend i izoluar, pavarësisht kufizimeve të shumta, u hap ndaj letërsisë së vendeve gjeografikisht shumë të largëta. Aktualisht, po mbledhim dhe dokumentojmë shkrimet, librat, gazetat dhe dokumentet e kësaj periudhe, për të rindërtuar sa më plotësisht këtë histori bashkëpunimi kulturor.

Ekspozita do të qëndrojë e hapur për publikun deri në muajin nëntor për të njohur nga afër botime dhe dokumente që hedhin dritë mbi një pjesë të historisë së letërsisë, por edhe mbi mënyrën se si ajo mbërrinte te lexuesit shqiptarë në kushtet e izolimit.