Dy shqiptarë të arrestuar dhe dënuar në Britaninë e Madhe për shpërndarjen e kokainës

Dy shqiptarë, Mikele Bilali dhe Ervin Hasa, u arrestuan dhe dënuan në Britaninë e Madhe për shpërndarjen e kokainës. Bilali u dënua me një vit e 10 muaj burg, ndërsa Hasa me tre vite burg.

Gjatë një patrullimi në zonën Boothen të Stoke-on-Trent, policia ndaloi një automjet të zi tip “Mercedes” që drejtohej nga Bilali. Hasa iu afrua automjetit dhe komunikoi me Bilalin, ndaj edhe ai u arrestua. Gjatë kontrollit të makinës, policia gjeti telefona celularë të lidhur me Bilalin, ku kishte mesazhe që lidhen me shpërndarjen e drogës, si dhe çelësa të një banese të përdorur nga Hasa.

Ky i fundit u gjet me 19 qese të vogla kokaine. Më pas, gjatë kontrollit të banesës, oficerët zbuluan rreth 10.700 paund të fshehura në një çantë të markës “Gucci”, brenda mobilies së televizorit. Në një kuti videolojërash u gjetën edhe 1.000 paund të tjera, ndërsa në banesë u zbuluan më shumë se 210 qese me kokainë.

Edhe Bilali u gjet me drogë gjatë kontrollit në ambientet e paraburgimit, ku iu zbuluan 11 qese të vogla kokaine të fshehura në pantallona. Në total, policia sekuestroi 241 qese me kokainë, me një vlerë të përllogaritur në treg prej rreth 9.500 paundësh, si dhe më shumë se 11.900 paund në para të gatshme.

Sipas policisë, të dy të arrestuarit fillimisht nuk pranuan të jepnin deklarata gjatë marrjes në pyetje, por më vonë u akuzuan dhe pranuan veprat penale në gjykatë. Pas shpalljes së dënimeve, kryeinspektori Steve Morrey, nga departamenti i specializuar i krimeve në Policinë e Staffordshire, deklaroi se të dy personat ishin të përfshirë në shpërndarjen e lëndëve narkotike në Stoke-on-Trent. Ai theksoi se policia do të vijojë punën për të goditur dhe ndjekur penalisht personat e përfshirë në trafikun e drogës në zonën e Staffordshire.