Policë largon mediat nga Kryeministria, gazetari i News24 përplaset me efektivët
Incident i regjistruar gjatë protestës studentore përpara Kryeministrisë në Tiranë, ku gazetari i News24 është përplasur verbalisht me efektivët e Policisë shtetërore.
Një incident i rëndë është regjistruar gjatë protestës sotme përpara Kryeministrisë në Tiranë. Gazetari i News24, Renaldo Salianji, është përplasur verbalisht me efektivët e Policisë shtetërore, ndërsa po raportonte zhvillimet nga terreni.
Përplasja ka ndodhur në momentin kur forcat e rendit kanë kërkuar largimin e grupeve të xhirimit të mediave nga zona përpara godinës së qeverisë, ku po zhvillohej protesta studentore. Gazetari i News24 ka kundërshtuar urdhrin e efektivëve, duke kërkuar sqarime për arsyet e largimit të përfaqësuesve të medias dhe për kufijtë e perimetrit të sigurisë.
“Pse duhet të largohen mediat nga Kryeministria? Ku është perimetri i sigurisë? Kush është rreziku që na kanoset?” dëgjohet të thotë gazetari gjatë debatit me policët. Incidenti ka ndodhur në një kohë kur policia ka ndërhyrë për të shpërndarë protestuesit dhe ka nisur shoqërimin e disa prej tyre, pas tensioneve të regjistruara gjatë tubimit.
Largimi i grupeve të xhirimit ka ngritur pikëpyetje mbi mundësinë e gazetarëve për të ndjekur dhe dokumentuar nga afër veprimet e policisë gjatë protestës.