Qeverisja me votë nuk rrëzohet nga molotovët dhe gurët!
Protestat e dhunshme dhe shkatërrimet nuk po arrijnë të rrëzojnë qeverinë me votë, por në vend të kësaj, largojnë qytetarët nga dhuna dhe e kanë të qartë se shkatërrimi i qendrës së kryeqytetit nuk është fitore e tyre.
Protesta është një nga të drejtat themelore të demokracisë, por ajo nuk duhet të shkon deri në dhunë dhe shkatërrim. Kur protesta humbet qëllimin dhe dhuna bëhet mesazhi, atëherë ajo nuk është më një protestë, por një shfaqje e dhunës.
Një ndryshim radikal demokratik nuk matet me numrin e xhamave të thyer, me mjediset e institucioneve kryesore publike të djegura dhe dhunuara, me sasinë e gurëve të hedhur, apo me dëmin e shkaktuar qindra bizneseve të sulmuara e shkatërrura. Ai matet me fuqinë e ideve, me mbështetjen e qytetarëve, me aftësinë për të bashkuar shoqërinë rreth një qëllimi dhe me alternativën që ofron për të ardhmen.
Një lëvizje që kërkon mbështetjen e shoqërisë duhet të bindë qytetarët se ka një qëllim, një program dhe një rrugë demokratike për ta arritur atë. Në të kundërt, rrezikon të shndërrohet në një spektakël mjeran përplasjesh të dhunshme, ku flaka, shkatërrimet dhe gurët mbulojnë çdo argument.