Rama shtron 'tavolinën' para Kryeministrisë, por studentët refuzojnë

Kryeministri Edi Rama ka ndryshuar mënyrën e ftesës së tij për dialog me studentët, të cilët vazhdojnë të protestojnë për dorëheqjen e tij. Përpara godinës së Kryeministrisë është vendosur një gur në formën e një tavoline, si një simbol i ftesës së kreut të qeverisë për dialog me të rinjtë.

Ndryshe nga ditët e mëparshme, kur përpara Kryeministrisë ishin vendosur karrige, këtë herë është zgjedhur një tavolinë prej guri. Ky ndryshim vjen pasi studentët, gjatë protestave të ditëve të fundit, u kanë vënë flakën karrigeve të dialogut dhe kanë rrokullisur gurët e vendosur më herët nga kryeministri, duke shprehur në këtë mënyrë refuzimin e tyre për t'u ulur në bisedime.

Pavarësisht ftesave të përsëritura të Rames, studentët kanë vazhduar të këmbëngulin në kërkesën për largimin e tij nga posti i kryeministrit, duke e konsideruar dialogun të papranueshëm për sa kohë kjo kërkesë nuk plotësohet.