Ilija Srdanoviç, kardiologu që rrëzoi Vuçiç pas 14 vitesh në pushtet

Ilija Srdanoviç, një kardiolog dhe profesor në Fakultetin e Mjekësisë në Novi Sad, është figura që udhëhoqi drejt fitores "Listën e Studentëve" në Serbi, duke i dhënë fund dominimit politik 14-vjeçar të Aleksandar Vuçiçit. Partia e drejtuar nga Vuçiç arriti të marrë 38.7% të votave, kundër Listës Studentore, e cila arriti të marrë 52% të votave, që përkthehen në 140 mandate në Parlament.

Srdanoviç është një kardiolog dhe profesor në Fakultetin e Mjekësisë në Novi Sad, i njohur për karrierën e tij në mjekësi. Ai u bë i njohur për publikun pas mbështetjes që u dha protestave studentore, të cilat shpërthyen pas tragjedisë në stacionin hekurudhor të Novi Sadit në nëntor të vitit 2024.

Më 14 shtator 2026, studentët që organizuan protestat njoftuan se ai do të kryesonte listën e tyre zgjedhore, të paraqitur me emrin "Lista Studentore". Në një intervistë për median serbe Nova.rs, Srdanoviç deklaroi se ndihej i nderuar nga besimi i studentëve. Ai bëri gjithashtu të ditur se nuk kishte ndërmend të hiqte dorë nga profesioni i mjekut dhe nga kujdesi për pacientët për shkak të angazhimit politik.

Srdanoviç ka lindur në vitin 1970 në Novi Sad, ndërsa shkollën fillore dhe gjimnazin e ka përfunduar në Vrbas. Studimet e mjekësisë i përfundoi në Fakultetin e Mjekësisë në Novi Sad në vitin 1995. Në vitin 2001 përfundoi specializimin në mjekësinë interne, ndërsa në vitin 2004 specializimin e ngushtë në kardiologji.

Në vitin 2010 mori gradën master në kardiologji në Fakultetin e Mjekësisë në Beograd, kurse në vitin 2012 mbrojti doktoraturën në të njëjtin fushë në Novi Sad. Që nga viti 1997, ai është i angazhuar në Institutin e Sëmundjeve Kardiovaskulare të Vojvodines, në Sremska Kamenica. Paralelisht, prej vitit 2018 jep mësim në Fakultetin e Mjekësisë në Novi Sad, në katedrën e mjekësisë së urgjencës.

Përfshirja e Srdanoviçit në lëvizjen studentore u bë e dukshme pas protestave të organizuara për kërkesën e përgjegjësisë për tragjedinë në Novi Sad. Ai mori pjesë në tubime publike dhe mbajti fjalime në mbështetje të studentëve, përpara se të zgjidhej kryesues i listës zgjedhore.

Në takimin e parë parazgjedhor të lëvizjes studentore në Novi Sad, ai vlerësoi rolin e të rinjve në mobilizimin e shoqërisë dhe në përpjekjen për ta ndryshuar vendin. Në një intervistë për agjencinë Beta, të publikuar nga Danas, Srdanoviç tha se ndryshimi politik duhet të shoqërohet me rikthimin e besimit te institucionet, forcimin e shtetit të së drejtës dhe luftën kundër korrupsionit.

Çfarë kërkon Lista Studentore?

Sipas deklaratave të Srdanoviçit të raportuara nga mediat serbe, ndër paraparësitë e lëvizjes janë rikthimi i pavarësisë së institucioneve, lufta kundër korrupsionit, përmirësimi i funksionimit të sistemit gjyqësor dhe garantimi i lirisë së medias. Në fushën e shëndetësisë, ai ka vënë theksin te depolitizimi i profesionit, krijimi i kushteve më të mira për mjekët e rinj dhe nxitja e punësimit të personaleve shëndetësor në zonat rurale.

Sipas tij, subvencionet dhe lehtësitë për profesionistët që zgjedhin të punojnë jashtë qendrave të mëdha mund të ndihmojnë në nxitjen e shëndetësisë në zonat rurale.