Vrasje në Kosovë: Gruaja vdiq pasi kishte telefonuar policinë për ndihmë
Një grua është vrarë në Kosovë, dy orë pasi kishte telefonuar policinë për ndihmë. Vrasja është regjistruar në Vitomiricë dhe dyshohet se është bërë nga një mjet i fortë.
Një ngjarje e rëndë është regjistruar në Kosovë, ku një grua është vrarë. Ngjarja është regjistruar rreth orës 21:10 në Vitomiricë. Më tej, bëhet i njohur se vrasja është regjistruar dy orë pasi viktima kishte telefonuar policinë për ndihmë duke iu raportuar dhunën në familje.
Sipas të dhënave fillestare të Policisë, dyshohet se gruaja vdiq si pasojë e goditjeve me një mjet të fortë. Policia ka bërë të ditur se i dyshuari, që dyshohet të jetë kunati i viktimës, ndodhet në arrati.
Është raportuar se viktima, tre ditë para vrasjes, përmes një letre i është drejtuar kryeprokurores së Prokurorisë së Pejës, përmes së cilës ka shprehur pakënaqësinë me zyrtarët të cilët po trajnonin rastin e saj.
Ajo gjithashtu ishte ankuar për praninë e familjarëve të ish-bashkëshortit, Jeton Sylaj në shtëpinë ku ajo pretendonte se po i pengohej kthimi. Ajo kishte kërkuar ndërhyrjen e Policisë, duke ngritur shqetësime edhe për moszbatimin e një vendimi gjyqësor lidhur me përkujdesjen ndaj fëmijës së saj.
“Uroj që të mos detyroheni të jepni llogari vetëm pasi të jetë marrë jeta ime”, kishte shkruar viktima.
Përmes kësaj letre, viktima kishte kërkuar hetime për të gjithë zyrtarët duke nisur edhe nga Qendra për Punë Sociale.
“Kjo është shpresa ime e fundit”, kishte shkruar ajo.
Lidhur me këtë çështje, Prokuroria Themelore në Pejë thotë se ka angazhuar prokuror për trajtimin e pretendimeve të viktimës, menjëherë pas pranimit të shkresës.