Bashkia e Tiranës shpallon 1500 fitues për kredi të buta për blerjen e banesës

Bashkia e Tiranës ka shpallur rreth 1500 fitues për programin "Për subvencionimin e interesave të kredive", që lehtëson financiarisht individët dhe familjet me ardhura të ulëta për të blerë një banesë në kryeqytet. Programi është një nga nismat e para të kryebashkiakut Erion Veliaj në fillim të detyrës së tij.

Lista e aplikuesve të shpallur fitues, të cilëve do t'u subvencionohen interesat e kredisë nga buxheti i shtetit për blerjen e një apartamenti në Tiranë, është dërguar për miratim në mbledhjen e muajit tetor të Këshillit Bashkiak. Programi për subvencionimin e interesave të kredive ka qenë një nga nismat e para të kryebashkiakut Erion Veliaj në fillim të detyrës së tij. Ai synon të lehtësojë barrën financiare për individët dhe familjet me ardhura të ulëta, duke subvencionuar një pjesë të interesit të kredisë për blerjen e një banese.

Përmes këtij mekanizmi, përfituesit kanë mundësi të sigurojnë një shtëpi me kushte më të favorshme financiare, ndërsa kredia shlyhet me një normë interes prej 3%, sipas kushteve të programit. Pas miratimit të listës nga Këshilli Bashkiak, fituesit duhet të paraqiten pranë bankave të nivelit të dytë, të cilat Bashkia e Tiranës ka lidhur marrëveshje për të vijuar procedurat e përfitimit të kredisë së butë për blerjen e banesës.

Vlera e kredisë që përfiton çdo aplikues përcaktohet në bazë të numrit të anëtarëve të familjes dhe kritereve të programit. Për shumë familje që përballen me vështirësi për të përballuar kostot e larta të banimit, ky program përbën një mundësi konkrete për të u afruar realizimit të ëndrrës për të pasur një shtëpi të tyre.